Вакцына Moderna паказала эфектыўнасць супраць новых штамаў каранавіруса
6- 25.01.2021, 17:59
- 17,244
Мутацыі здольныя змяняць ключавыя характарыстыкі віруса.
Вакцына ад каранавіруса распрацоўкі амерыканскай кампаніі Moderna паказала эфектыўнасць супраць брытанскага і паўднёваафрыканскага штамаў. Пра гэта паведамляе Reuters (пераклад - nv.ua).
У заяве ўказваецца, што падчас лабараторных выпрабаванняў удалося пацвердзіць выпрацоўку нейтралізуючых антыцелаў да новых мутацый каранавіруса, выяўленых у Вялікай Брытаніі ды Паўднёва-Афрыканскай Рэспубліцы.
Паводле звестак Moderna, дзвюхфазная вакцынацыя ад COVID-19 забяспечыць ахову ад новых штамаў каранавіруса.
Навукоўцы занепакоеныя распаўсюджваннем мутацый каранавіруса, выяўленых у Вялікай Брытаніі і ПАР, бо мяркуецца, што яны здольныя змяняць ключавыя характарыстыкі віруса.
Што вядома аб новых штаме каранавіруса
У канцы снежня 2020 года ў Вялікай Брытаніі выявілі новы штам каранавіруса. Навукоўцы лонданскага Імперскага каледжа прыйшлі да высновы, што новая мутацыя каранавіруса значна больш заразная, чым папярэдняя версія віруса.
Пасля выявілі новыя штамы каранавіруса ў ПАР, Бразіліі ды Нямеччыне. Навукоўцы мяркуюць, што новыя мутацыі каранавіруса больш заразныя, чым іншыя варыянты віруса.
Паводле звестак Сусветнай арганізацыі аховы здароўя, брытанскі штам каранавіруса выявілі ў 60 краінах і тэрыторыях, паўднёваафрыканскі - у 23.