Экспэрт: Расея сама стала адчуваць на сабе негатыўныя наступствы беларускага транзіту

Беларусь ператварылася ў канчатковы пункт канцэнтрацыі нелегалаў.

У Горадні міліцыя затрымала 24 іракцаў без дакументаў, якія пацвярджаюць легальны статус знаходжання ў Беларусі. Пра замежнікаў у міліцыю паведаміла адміністрацыя гатэля, у якую візіцёры спрабавалі засяліцца. Супрацоўнікі праваахоўных органаў паабяцалі выслаць тых на радзіму.

Таксама напярэдадні стала вядома, што грамадзяне Сірыі, Афганістана, Пакістана, Нігерыі, Емена, Егіпта і Ірана не змогуць як раней атрымліваць беларускія візы ў менскім аэрапорце. Мігранты сталі праблемай для ўладаў Беларусі? «Филин» спытаў у палітычнага аналітыка Арсенія Сівіцкага.

- Так, усё сапраўды так. І гэта шмат у чым сведчанне таго, што краіны Балтыі, якія зазнаюць на сабе найбольшы ціск ад міграцыйнага крызісу, змаглі ўзяць пад эфектыўны кантроль мяжу з Беларуссю і ператварыць такім чынам тэрыторыю нашай краіны ў канчатковую пункт канцэнтрацыі мігрантаў.

Як вынік, Беларусь цяпер сутыкаецца з аналагічнай сітуацыяй, з якой у свой час сутыкнулася Турцыя. Тады краіны ЕЗ змаглі паспяхова купіраваць так званы «Балканскі маршрут» нелегальнай міграцыі з Усходу. У выніку, уцекачы засталіся на тэрыторыі Турцыі, мясцовыя ўлады былі вымушаныя будаваць для іх лагеры.

У выпадку з Беларуссю, вядома, маштабы несупастаўныя. Тым не менш, відавочна, што ўлады апынуліся ў падобнай сітуацыі і ўмовах. Галоўная рызыка канцэнтрацыі мігрантаў на тэрыторыі нашай краіны звязаная з пагаршэннем крымінагеннага становішча. Ужо здаралася, што мігранты пранікалі ў дамы ў сельскай мясцовасці, каб пераначаваць там з надыходам халадоў. Ёсць і іншыя прэцэдэнты, калі яны парушалі грамадскі парадак.

Відавочна, што па меры канцэнтрацыі замежнікаў у Беларусі і немагчымасці для іх дабрацца да адной з краін ЕЗ, крымінагенная абстаноўка будзе пагаршацца.

Ці не будуць такія крокі азначаць, што ўлады ўсё ж з'яўляюцца галоўным каталізатарам міграцыйнага канфлікту? Гэта ж «страта твару» ў вачах заходніх краін.

- Афіцыйна Беларусь адхрышчваецца ад правакавання крызісу, таму ў выпадку, калі сітуацыя пачне стабілізавацца, то можна звярнуцца да аргументаў аб'ектыўнага і натуральнага характару.

Напрыклад, беларускія ўлады ў адказ на абвінавачванні заходніх краін запэўнівалі, што гэта якраз-такі ЗША і іх хаўруснікі выклікалі канфлікт сваёй бяздумнай палітыкай у краінах блізкага Усходу.

Калі міграцыйныя плыні спыняцца, можна будзе вынайсці аналагічны аргумент: пагаршаюцца ўмовы надвор'я ці эпідэміялагічная сітуацыя - усё гэта перашкаджае пранікненню замежнікаў у Беларусь. Напраўду, адыграць гэты крызіс назад і захаваць твар не ўяўляе сур'ёзнай праблемы.

Відавочна, што на гэтае рашэнне ўплываюць не толькі палітычныя фактары, у тым ліку і пагаршэнне крымінагеннай абстаноўкі, пра якую я казаў раней, але і знешні націск. Гаворка ідзе не толькі пра падрыхтоўку пятага пакета санкцый з боку Еўразвязу, а таксама аб дадатковых абмежаваннях ад ЗША і Вялікабрытаніі.

Таксама мы кажам і пра Расею, якая сама стала адчуваць на сабе негатыўныя наступствы беларускага транзіту. Гэта афганскія ўцекачы з аднаго боку, а з другога - сталыя папрокі ад заходніх партнёраў з нагоды паводзін хаўруснікаў РФ, а таксама просьбы неяк паўплываць на Менск і стабілізаваць сітуацыю на мяжы з ЕЗ.

Больш за тое, па розных каналах Крэмль даводзіць да сваіх заходніх партнёраў, што не мае дачынення да правакаванні гэтага канфлікту, уся адказнасць ляжыць на беларускім баку. Гэта таксама неабходна прымаць да ўвагі.