Журналісты даведаліся, ці вярнулі каштоўнасці кліентам «Белгазпрамбанка», якія зніклі з ячэек пасля ператрусу

Многія заяўлялі, што бачылі свае зберажэнні ў сюжэтах БТ.

Некаторыя кліенты «Белгазпрамбанка» пасля ператрусу ў галаўным офісе ў чэрвені мінулага года напісалі заявы ў банк і міліцыю праз згубу каштоўнасцяў з дэпазітарных ячэек. Да прыкладу, грамадзянка Украіны заяўляла, што ў яе канфіскавалі амаль 170 тысяч даляраў. Пацярпелыя кліенты скардзіліся, што іх не апавяшчалі пра якія-небудзь дзеянні ў дачыненні да змесціва ячэек. Некаторыя распавядалі, што бачылі свае каштоўнасці ў сюжэтах па дзяржаўнай ТВ пра «даходы» Віктара Бабарыкі і крымінальную справу супраць топ-мэнэджараў банка. Zerkalo.io паспрабавала даведацца, ці вярнулі кліентам банка канфіскаванае змесціва дэпазітарных ячэек.

Нагадаем, пасля ператрусу ў чэрвені мінулага года ў галаўным офісе «Белгазпрамбанка» некаторыя кліенты выявілі, што з іх дэпазітарных ячэек прапала змесціва. Пацярпелыя звярталіся з заявамі ў банк, міліцыю, КДК, КДБ, Генпракуратуру і Адміністрацыю Лукашэнкі. У самім банку распавядалі, што заявы праз ускрыццё дэпазітарных ячэек напісалі 8 кліентаў, іх перадалі ў Дзяржкантроль. Пазней пацярпелыя кліенты банка распавядалі, што іх заявы перанакіравалі ў КДБ, а іх саміх выклікалі туды.

Як мінімум адзін з пацярпелых кліентаў «Белгазпрамбанка» дагэтуль не атрымаў каштоўнасці, якія канфіскавалі з дэпазітарнай ячэйкі падчас вобшукаў. Ён атрымаў толькі дакументы, а грошы і каштоўнасці сілавікі не вярнулі.

«Няма ніякіх рухаў», - распавёў кліент банка. З ягоных слоў, ён не разлічвае ўжо вярнуць змесціва ячэйкі. «Дамова з банкам на арэнду дэпазітарнай ячэйкі скончылася, наўрад ці ад банка цяпер будуць навіны», - удакладніў кліент «Белгазпрамбанка».

Звязацца з іншымі пацярпелымі кліентамі гэтага банка, у якіх таксама прапала змесціва ячэек, не ўдалося. Паводле нашай інфармацыі, заявы ў КДК напісалі як мінімум 4 пацярпелыя кліенты банка.

Нагадаем, сярод тых, у каго выявілі дэпазітарную ячэйку і канфіскавалі яе змесціва, была ў тым ліку грамадзянка Украіны. Іншаземка, якая заяўляла пра знікненне больш чым 170 тысяч даляраў, яна звярталася да Аляксандра Лукашэнкі. Ёй праз некаторы час вярнулі грошы.

Яшчэ адзін кліент банка ацэньваў агульную суму канфіскаваных каштоўнасцяў з яго дэпазітарнай ячэйкі ў «Белгазпрамбанку» на 120 тысяч рублёў. У яго зніклі ў тым ліку наяўныя даляры і еўры, залатыя мерныя зліткі Нацбанку, інвестыцыйныя манеты, лэджэры.