Гендырэктар «Нямецкай хвалі» назваў блакаванне сайта ў Беларусі актам роспачы Лукашэнкі

Прэтэнзіі ўладаў Беларусі да сайта Петэр Лімбург назваў смяхотнымі.

Генеральны дырэктар медыякампаніі Deutsche Welle Петэр Лімбург (Peter Limbourg) расцаніў блакаванне ў Беларусі сайта DW і шэрагу іншых СМІ як акт роспачы беларускага рэжыму. «Прэтэнзіі да DW абсалютна смяхотныя. Спадар Лукашэнка паказаў, што ў барацьбе супраць свайго ўласнага народа ён не цураецца нічога, каб утрымацца ва ўладзе», - гаворыцца ў заяве Лімбурга, апублікаванай у пятніцу, 29 кастрычніка.

«Актыўнае выкарыстанне рэсурсаў незалежных СМІ з усёй яснасцю дэманструе, што людзі ў Беларусі больш не давяраюць кантраляваным дзяржавай сродкам масавай інфармацыі. Мы пратэстуем супраць блакіроўкі нашых рэсурсаў, бо людзі там маюць права на аб'ектыўную інфармацыю аб сітуацыі ў іх краіне», - падкрэсліў генеральны дырэктар DW.

Аб блакіроўцы сайта DW у Беларусі першапачаткова паведамілі 28 кастрычніка карыстальнікі сацсетак. Пры спробе адкрыць сайт DW праз «Белтэлекам» у браўзэры з'яўляецца плашчак з паведамленнем аб блакіроўцы. З мабільных прылад рэсурс таксама недаступны.

У прэс-рэлізе DW, выпушчаным 29 кастрычніка, зазначаецца, што ў пачатку 2021 года медыякампанія значна пашырыла лінейку інфармацыйнай прадукцыі для Беларусі для медыйнага суправаджэння падзей, звязаных з абуджэннем грамадзянскай супольнасці ў гэтай краіне.

«DW зрабіла барацьбу супраць цэнзуры адным са сваіх асноўных прынцыпаў і паслядоўна выступае за атрыманне людзьмі ва ўсім свеце рэлевантнай для іх інфармацыі. У многіх краінах дзяржкантроль над інфраструктурай прыводзіць да цэнзуры або поўнай блакіроўкі інфармацыі. DW ужо даўно працуе над шляхамі абыходу цэнзуры. Так, да прыкладу, у краінах, дзе ўрады блакуюць доступ да незалежных навін, людзі дзякуючы праекту Tor могуць бяспечна і ананімна карыстацца рэсурсамі DW. Вэб-сайты, якія даступныя праз Tor, можна распазнаць праз расшырэнне «.onion». Для такога доступу патрабуецца адмысловы браузэр, такі як Tor, створаны на базе Firefox», - гаворыцца ў прэс-рэлізе DW.

У дакуменце таксама паведамляецца, што ў апошнія дзесяць гадоў DW ужывае сістэму абыходу цэнзуры Psiphon, якая функцыянуе праз сетку розных проксі-сервераў. «Дзякуючы гэтай тэхналогіі, карыстачы ў такіх краінах, як Кітай і Іран, маюць магчымасць атрымліваць доступ да інфармацыі з надзейных крыніц», – адзначаецца ў прэс-рэлізе DW.