Улады расейскага Кузбаса абмежавалі доступ журналістаў да шахцёраў, якія выжылі
7- 28.11.2021, 20:56
- 7,376
Пахаванне загінулых таксама праходзіць у закрытым рэжыме.
Адміністрацыя расейскага Кузбаса забараніла зносіны журналістаў з гарнякамі, якія пацярпелі падчас аварыі на шахце "Лісцяжная", паведамляе "Новая газета".
Паводле звестак выдання, большасць з выжылых шахцёраў знаходзяцца цяпер у абласной клінічнай лякарні хуткай медыцынскай дапамогі імя Падгарбунскага. Каля ўваходу ў шпіталь дзяжураць паліцыянты.
У прэс-службе адміністрацыі ўрада Кузбаса журналістам заявілі, што зносіны з пацярпелымі на "Лісцяжнай" не дапускаюцца паводле рэкамендацыі лекараў.
Асобна зазначаецца, што пахаванне загінулых шахцёраў таксама праходзіць у закрытым ад прэсы рэжыме. У абласной адміністрацыі адмаўляюцца паведамляць працаўнікам СМІ пра даты і месцы развітання, спасылаючыся на адсутнасць згоды на гэта сем'яў гарнякоў.
Напярэдадні РБК са спасылкай на аповеды шахцёраў паведамляла, сярод іншага, пра тое, што гарнякам перад спускам у забой неаднаразова выдавалі датчыкі метану, якія паказвалі заведама заніжаныя лічбы канцэнтрацыі небяспечнага газу. Таксама паведамлялася пра праблемы з арганізацыяй выратавальнай аперацыі на шахце.
Аварыя на шахце "Лісцяжная" ў Бялоўскай гарадской акрузе Кемераўскай вобласці адбылася раніцай 25 лістапада. Загінуў 51 чалавек, у тым ліку пяць горнаратавальнікаў. На стан поўдня нядзелі, за пацярпелых уважаюцца 76 гарнякоў.
Згодна з папярэдняй версіяй, шахцёры загінулі праз выбух метану і ягоных наступстваў. Сваякі пацярпелых у аварыі сцвярджаюць, што за апошнія гады на шахце "Лісцяжная" былі выяўленыя дзясяткі парушэнняў, аднак кіраўніцтва прадпрыемства не ўхіляла іх, змушаючы гарнякоў працаваць у заведама небяспечных для жыцця ўмовах.