У Польшчы ўвялі абмежаванні праз новы штам каранавіруса «Амікрон»

Міністр аховы здароўя Польшчы абвясціў пра забарону палётаў у сем краін, прызнаных краінамі асаблівай рызыкі.

У сувязі са з'яўленнем новага штаму каранавіруса міністр аховы здароўя Польшчы абвясціў пра забарону палётаў у сем краін, прызнаных краінамі асаблівай рызыкі. Людзі, якія вяртаюцца з гэтых краін, павінны будуць адбыць 14-дзённы карантын, паведамляе «Польское радио».

«Выконваючы рэкамендацыі Еўрапейскага цэнтра прафілактыкі і кантролю захворванняў мы забараняем палёты ў сем краін, якія былі пералічаныя ў рэкамендацыях гэтага ведамства. Гэта Батсвана, Эсваціні, Лесота, Мазамбік, Намібія, ЦАР і Зімбабвэ. Гэтыя краіны былі прызнаныя Еўрапейскім цэнтрам прафілактыкі і кантролю захворванняў асабліва небяспечнымі. У выпадку з гэтымі краінамі ў пагадненні з Міністэрствам інфраструктуры будзе ўведзеная забарона на палёты», - сказаў кіраўнік ведамства.

Адам Нядзельскі дадаў, што з 1 снежня ва ўсіх аб'ектах, дзе ліміт на запаўненне складаў 75 працэнтаў, ён будзе зніжаны да 50 працэнтаў.

Кіраўнік ведамства зазначыў, што абмежаванні будуць дзейнічаць да 17 снежня.

Таксама будуць зменены абмежаванні на сходы і ўрачыстасці. Раней на іх магло знаходзіцца 150 чалавек, зараз жа - да 100. Міністр удакладніў, што гаворка ідзе пра вяселлі, прычасці, іншыя сустрэчы, а таксама дыскатэкі.

Ліміт удзельнікаў спартыўных мерапрыемстваў, якія праводзяцца па-за спартыўнымі аб'ектамі, зменіцца з цяперашніх 500 чалавек на 250 чалавек. У такіх месцах, як спартыўныя залы, клубы і фітнэс-цэнтры, музеі і месцы, звязаныя з азартнымі гульнямі, дзе ліміт колькасці людзей залежаў ад паверхні і складаў адзін чалавек на 10 квадратных метраў, ён будзе падвышаны да аднаго чалавека на 15 квадратных метраў.

Адам Нядзельскі адзначыў, што па меры развіцця сітуацыі рашэнні могуць быць зменены.

Міністэрства замежных спраў Польшчы сочыць за сітуацыяй палякаў у краінах, дзе распаўсюджваецца Амікрон, гэта значыць новы штам каранавіруса.

Прадстаўнік МЗС Лукаш Яшына заявіў, што гаворка ідзе найперш пра краіны, якія неўзабаве будуць ізаляваныя.

«Гэта, напрыклад, Цэнтральнаафрыканская Рэспубліка. Мы стараемся забяспечыць вяртанне ў Польшчу пэўнай колькасці людзей. Я думаю, што на працягу некалькіх дзён мы ўсталюем дакладную колькасць людзей, якіх трэба будзе вярнуць, якім трэба будзе дапамагчы. Гэта не такое маштабнае закрыццё межаў, як паўтара гады таму. Гэта задача лягчэйшая. Усе нашы консульскія ўстановы кантактуюць адна з адной», - сказаў ён.

МЗС таксама не выключае адпраўку самалётаў за польскімі грамадзянамі ў краіны, ахопленыя абмежаваннямі ў сувязі з распаўсюджваннем новай мутацыі каранавіруса.

Новы штам быў ідэнтыфікаваны ў Паўднёвай Афрыцы і прадстаўлены Сусветнай арганізацыі здароўя ў мінулую сераду. Іншыя краіны пацвярджаюць выпадкі заражэння гэтым штамам. Пакуль няма інфармацыі пра смерць людзей, інфікаваных Амікронам. Падрабязная інфармацыя аб гэтым штаме таксама адсутнічае. Даследаванні могуць заняць ад некалькіх дзён да некалькіх тыдняў.