У начальніка ДІБДР у Расеі, акрамя палаца з залатым унітазам, знайшлі 21 аб'ект нерухомасці і шэсць аўто
12- 9.12.2021, 11:49
- 20,174
Ягоныя падначаленыя валодалі актывамі на сотні мільёнаў рублёў.
У арыштаванага паводле справы аб карупцыі кіраўніка стаўрапольскага ДІБДР Аляксея Сафонава знайшлі яшчэ 21 аб'ект нерухомасці і шэсць аўтамабіляў, якія былі аформленыя на самога палкоўніка і ягоных блізкіх. Пра гэта паведаміў генеральны пракурор РФ Ігар Красноў у інтэрв'ю агенцтву РІА Навіны. Раней у Сафонава выявілі камяніцу з залатым унітазам.
Са слоў Краснова, найбліжэйшым часам суд разгледзіць пазоў аб вяртанні названай маёмасці ў даход дзяржавы. Генпракурор дадаў, што ў шэрагу падначаленых Сафонава, якія праходзяць паводле ягонай справы, меліся актывы на сотні мільёнаў рублёў.
"Да крымінальнай адказнасці ў гэтай справе прыцягваецца не толькі названы ўладальнік дарагой нерухомасці, але і шэраг ягоных падначаленых, якія таксама аскетычным ладам жыцця пахваліцца не могуць. Агульны кошт маёмасці, набытай імі ў перыяд службы на непацверджаныя даходы, перавышае сотні мільёнаў рублёў", – сказаў Красноў.
Кіраўніка ДІБДР Стаўрапольскага краю Аляксея Сафонава і больш як 30 ягоных калег затрымалі паводле крымінальнай справы аб атрыманні хабару арганізаванай групай у асабліва вялікай суме (частка 6 артыкула 290 КК) у ліпені 2021 года.
У працоўных кабінетах і дамах падазраваных прайшлі ператрусы. У камяніцы Сафонава знайшлі мэблю і тэхніку з залатым аздабленнем, у тым ліку залатыя ўнітазы. Сцвярджаецца, што затрыманыя супрацоўнікі ДІБДР "у складзе злачыннай групы займаліся продажам дакументаў і прыгожых аўтанумароў".
Таксама, паводле версіі следства, пад кіраўніцтвам Сафонава ўдзельнікі групы прадавалі дальнабойшчыкам пропускі, каб працаваць у рэгіёне "з парушэннямі адміністрацыйнага заканадаўства". СК падлічыў, што фігуранты зарабілі больш за 19 млн рублёў.