15 красавiка 2021, Чацвер, 7:31
Сім сім, Хартыя 97!
Рубрыкі

«Адважныя беларусы змаглі аб'яднацца і вымусілі Лукашэнку сысці з пасады»

15
«Адважныя беларусы змаглі аб'яднацца і вымусілі Лукашэнку сысці з пасады»
ФОТА: ТАСС

Кіраўніцтва да дзеяння для пазбаўлення дыктатара рэшткаў улады.

Лукашэнка сышоў з пасады «прэзідэнта» Нацыянальнага алімпійскага камітэта (НАК). Дакладней, яго прымусілі сысці. Лукашэнка 23 гады ўзначальваў НАК: гэта была ягоная самая любімая цацка, магутны прапагандысцкі інструмент і магчымасць прыязджаць у тыя краіны, куды інакш яго не пусцілі б. І нягледзячы на гэта ўсё, цяпер ён вымушаны пакінуць пасаду. Разбіраемся, чаму так адбылося і што гэта значыць, піша тэлеграм-канал «Лялькавод і авечка».

Калі памятаеце, у жніўні-верасні з'явіўся маштабны рух беларускіх спартоўцаў, якія сталі на бок народа. Для лукашыстаў гэта стала вельмі балючай нечаканасцю. Бо спартоўцаў заўсёды ўважалі дарослымі дзецьмі, утрыманцамі на шыі дзяржавы. Лукашэнка і ў страшным сне не мог уявіць, што спартоўцы, высвятляецца, у прынцыпе могуць мець сваё меркаванне. Прычым гэта былі не некалькі нікому невядомых атлетаў, а тысячы, сярод іх самыя тытулаваныя і вядомыя беларускія спартоўцы.

Большасць значных беларускіх спартоўцаў небаязлівага роду. Яны стварылі ўласную арганізацыю, сабралі шматлікія факты пераследу паводле палітычных матываў з боку НАК і вызначылі кантакты з міжнароднымі арганізацыямі. Гэта значыць спартоўцы выявілі сябе так сама, як і большасць беларусаў: людзьмі дзейнымі і гатовымі змагацца.

Лукашысцкі рэжым з уласцівай яму «далікатнасцю» ані не саромеўся масава і адкрыта рэпрэсаваць спартоўцаў за іх грамадзянскую пазіцыю. А гэта ўжо найгрубейшае парушэнне алімпійскай хартыі. МАК, як і любая міжнародная арганізацыя, не любіць скандалаў і надоўга расцягвае працэс прымання пастановаў. Але злачынствы Лукашэнкі і ўзначаленага ім НАК настолькі відавочныя і маштабныя, што заплюшчваць на іх вочы стала больш нельга.

Перад беларускім НАК замаячыла вельмі сумная перспектыва. З вялікай дзеллю верагоднасці спартоўцы, якія пастанавілі застацца ля рэжымных начовак, не змогуць выступаць пад чырвона-зялёным сцягам – замест яго будзе алімпійскі сцяг. Пры гэтым сумленныя спартоўцы Беларусі, выключаныя з зборнай за сваю пазіцыю, таксама змогуць выступіць пад тым самым алімпійскім сцягам. Гэта значыць магчымая сітуацыя, калі спаборнічаць будуць дзве каманды з Беларусі. А беручы да ўвагі, што топавых атлетаў сярод сумленных больш, чым сярод рэжымных, то любое спаборніцтва можа скончыцца для Лукашэнкі рэпутацыйнай катастрофай. Таму Лукашэнка і быў вымушаны сысці з НАК.

Важна разумець, што адстаўкі Лукашэнкі не дастаткова для таго, каб МАК перагледзеў свае погляды на сітуацыю ў Беларусі. Масавыя рэпрэсіі супраць спартоўцаў ужо ўчыненыя, кіраўнікі федэрацый, якія непасрэдна здзяйснялі службовыя злачынствы, на сваіх месцах, у зборных нікога не аднаўляюць. Сыход аднаго чалавека тут не дапаможа. Зыходзячы з гэтага мы мяркуем, што галоўная матывацыя адстаўкі Лукашэнкі – гэта спроба ўнікнуць рэпутацыйных стратаў.

Сітуацыя такая, што спорт з важнага прапагандысцкага інструменту ператвараецца ў месца, дзе Лукашэнку не чакае нічога акрамя публічных паразаў (як было з ЧС у хакеі). Вось былы кіраўнік і кідае тое, што сам і сапсаваў. На наш погляд, гэтая відавочна жаласная і баязлівая спроба перакласці адказнасць за ўласныя памылкі ягоную рэпутацыю ўжо не ратуе. Кожнае наступнае прыніжэнне на палях міжнародных спартовых арганізацый будзе адназначна ўспрынятае як асабістая параза Лукашэнкі. Занадта доўга ён прыпісваў сабе лаўры галоўнага «спарцмэна» краіны.

Выснова: адважныя дзейныя беларусы змаглі аб'яднацца і, прайшоўшы доўгі цярністы шлях, вымусілі Лукашэнку сысці з пасады прэзідэнта праз страх расплаты за рэпрэсіі. Гучыць выдатна. Гучыць як кіраўніцтва да дзеяння для пазбаўлення Лукашэнкі рэшткаў улады.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».