Навукоўцы высветлілі, як зрабіць чалавека больш шчаслівым

Даследаванне праводзілася цягам дзявяці месяцаў.

Італійскія навукоўцы з Універсітэта Трэнта правялі даследаванне, якое дапамагло знайсці спосабы зрабіць чалавека больш шчаслівым.

Як піша EurekAlert , гэтага атрымалася дамагчыся з дапамогай спецыяльнага працяглага трэнінгу.

Даследаванне праводзілася цягам дзявяці месяцаў у Інстытуце тыбецкай культуры Ламы Цонга Кхапы ў Памаі (Італія). Удзельнікі наведалі серыю прэзентацый і прагледзелі некалькі відэакурсаў, узялі ўдзел у адкрытых дыскусіях па псіхалогіі, нейрабіялогіі, гісторыі заходняй думкі і жыццёвай філасофіі будызму, а таксама выкарыстоўвалі практыкаванні, узятыя з розных будыйскіх і заходніх сузіральных традыцый. У якасці прыкладаў называюцца дыхальная медытацыя, аналітычная медытацыя і асабісты дзённік.

Вынікі паказалі павышэнне паказчыкаў псіхалагічнага дабрабыту. Удзельнікі даследавання таксама паведамілі аб памяншэнні трывожнасці, стрэсу, негатыўных думак, схільнасці да гневу. Даследчыкі назіралі пазітыўныя змены і памяншэнне адмоўных эмоцый як у кароткатэрміновай, так і ў доўгатэрміновай перспектыве цягам усёй праграмы.

«Трэнінг, які мы прапанавалі ўдзельнікам, быў натхнёны ідэяй, якая прысутнічае як у заходніх краінах, так і ў іншых краінах», - адзначае Мікола Дэ Пізапія, даследчык кафедры псіхалогіі і кагнітыўных навук Універсітэта Трэнта. Ён тлумачыць, што шчасце непарыўна звязанае з развіццём унутранай раўнавагі, добрым і адкрытым поглядам на сябе, іншых і на свет.

«Я мяркую, што ў часы, поўныя пераменаў і нявызначанасцяў, вельмі важна з навуковага пункту гледжання вывучыць, як заходнія і ўсходнія філасофскія традыцыі і апошнія адкрыцці могуць быць аб'яднаныя са свецкімі сузіральнымі практыкамі. Мэта палягае ў тым, каб даць здаровым людзям магчымасць працаваць над сабой, каб развіць сапраўднае шчасце, а не геданізм або павярхоўнае шчасце. Сваім даследаваннем мы хацелі зрабіць невялікі крок у гэтым накірунку», - кажа Мікола Дэ Пізапія.