Патрыярх любіць спакой і ананімнасць: як побач з палацам Пуціна знайшлася дача Кірыла

Кошт рэзідэнцыі кіраўніка РПЦ у Геленджыку - амаль 300 мільёнаў даляраў.

Журналісты выдання Readovka выявілі на ўзбярэжжы Чорнага мора побач з Геленджыком рэзідэнцыю, валоданне якой прыпісваюць патрыярху Кірылу.

Паводле звестак журналістаў, рэзідэнцыя належыць Маскоўскай патрыярхіі, а асабістай дачай патрыярха яна стала за 22 мільярды рублёў. Афіцыйна яе называюць «духоўным цэнтрам», але на справе туды прыязджае толькі патрыярх.

Адзін з аўтараў расследавання - журналістка Анастасія Мілюкова распавяла «Настоящему Времени», што вядома аб гэтым аб'екце і як рэагуюць на такі духоўны цэнтр мясцовыя жыхары.

- Кошт гэтай святой рэзідэнцыі 22 мільярды рублёў. Адкуль гэтая лічба?

- Першапачаткова мы атрымалі дакументы на будаўніцтва духоўнага цэнтра. Першапачаткова кошт гэтага духоўнага цэнтра быў 500 мільёнаў рублёў, плюс-мінус некалькі тысяч. Адпаведна, кошт пачаў расці, пляцоўка пачала пашырацца і вырасла да 22 мільярдаў. Таму такая сума. Гэта ўсё таксама вынікае з дакументаў, якія мы атрымалі на рукі.

- Калі гэта духоўны цэнтр, ці праходзяць там нейкія набажэнствы?

- Не, там яшчэ ні разу не праходзіла ніводнага набажэнствы, туды ўвесь час прыязджае патрыярх адпачываць. Больш за тое, сам надзел і ваколіцы - лясы і ўсё, што знаходзіцца каля дарогі, - ахоўваюць супрацоўнікі ФСА, таму вельмі складана там нават прагуляцца. Гэта стварае вялізныя праблемы для мясцовых жыхароў, для турыстаў.

- Гэта значыць, патрыярх Кірыл туды прыязджае некалькі разоў на год толькі дзеля адпачынку?

- Так, ён прыязджае дзеля адпачынку, дзеля гэтага высяляюць з суседняга санаторыя людзей - з пакояў, якія глядзяць на сам гэты палац. Больш за тое, паколькі гэта поўдзень Расеі, там вельмі шмат кавярняў, і каб не было шумнай музыкі, як я разумею, прадстаўнікі патрыярха абыходзяць гэтыя кавярні і папярэджваюць, каб не шумелі. Патрыярх любіць спакой і ананімнасць.

- Вы кажаце, што высяляюць з суседняга санаторыя - гэта менавіта ў той момант, калі прыязджае патрыярх Кірыл?

- Так. Там ёсць санаторый «Блакітная даль», у які прыязджаюць хворыя дзеці - дзеці з ДЦП. Паколькі там лячэбныя месцы, нумароў, я думаю, не так шмат, высяляюць, каб не глядзелі, як адпачывае патрыярх.

- Што-небудзь вядома аб меркаванні мясцовых людзей? Я так разумею, што тыя людзі, якія там жывуць, частка з іх, напэўна, працуе ў гэтым палацы?

- Не, з мясцовых ніхто ў гэтым палацы не працуе, наколькі мне вядома. Меркаванне мясцовых, канешне, вядомае - іх гэта вельмі напружвае, бо стварае вялікія праблемы. Напрыклад, там ёсць могілкі, якія максімальна блізка прылягаюць да самога палацу. Мясцовыя не могуць прайсці да гэтых могілак. Могілкі вельмі старыя, і да будаўніцтва палаца там была дарога, якая наўпрост вяла да гэтых могілак. Цяпер гэтай дарогі няма, мясцовым даводзіцца абыходзіць ажыўленай трасай, якую яны называюць «дарогай смерці» - там аднойчы нават загінуў хлопец, які пайшоў на могілкі.

Больш за тое, там ліквідаваная і турыстычная сцежка, такая старадаўняя турыстычная сцежка, якую будаваў мясцовы казак. Таму, вядома, [мясцовыя] абураюцца, але яны нічога не могуць з гэтым зрабіць.

- У суседнім палацы, які звязваюць з Пуціным, там ёсць і аквадыскатэка, і пад зямлёй лядовы палац. А што ёсць такога ў палацы ў Кірылы, акрамя таго, што там захопленая частка могілак?

- Там ёсць вінаграднікі. Ён яшчэ і, мяркуючы з усяго, любіць піць віно ўласнай вытворчасці. Мы рыхтуем прадаўжэнне гэтага расследавання, у нас на руках ёсць дакументы, мы цяпер іх правяраем. Яны сведчаць аб тым, што ў палацы патрыярха так жа багата, як і ў палацы ягонага суседа - у палацы Пуціна.