Жыхары Віцебска заступіліся за лекара, які распавёў праўду пра COVID-19
3- 4.03.2021, 10:39
- 3,616
Яны патрабуюць не звальняць Уладзіміра Мартава.
Жыхары Віцебска маюць намер звярнуцца ў галоўную ўправу аховы здароўя Віцебскага аблвыканкама з просьбай не звальняць загадчыка аддзялення анэстэзіялогіі і рэанімацыі БХМД Уладзіміра Мартава. Ужо створаная электронная петыцыя, цяпер ідзе збор подпісаў, паведамляе "Еўрарадыё".
"Мы думаем, што ў XXI стагоддзі звальненне за праўду бесчалавечнае!", - кажуць аўтары петыцыі.
3 красавіка ў Мартава заканчваецца кантракт. Адміністрацыя шпіталя праінфармавала ўжо лекара, што працягваць кантракт з ім не будуць.
У першую хвалю COVID-19 Мартаў публічна і сумленна распавядаў пра сітуацыю ў шпіталі - пра тое, што дзяржава фактычна кінула медыкаў сам-насам з нявывучанай хваробай, а са сродкамі аховы дапамагаюць пераважна валанцёры.
Аўтары петыцыі перакананыя, што Мартава звальняюць за ягоную сумленную і адкрытую пазіцыю.
"На наш погляд, гэта было зроблена з той прычыны, што Уладзімір Юр'евіч Мартаў стаў адным з першых лекараў у Беларусі, хто яшчэ ў красавіку 2020 года, калі ўлады ўпэўнівалі, што ніхто ад COVID-19 у нас не памірае, не пабаяўся заявіць, што праблема ёсць і яна сур'ёзная", гаворыцца ў звароце да управы здароўя.
Аўтары петыцыі просяць аднавіць лекара на пасадзе. Мартаў працуе лекарам блізу 30 гадоў, з красавіка 2016 года ён узначальвае аддзяленне анестэзіялогіі і рэаніматалогіі.
На раніцу чацвярга пад петыцыяй падпісаліся больш за 900 чалавек.