Індыйская вакцына Covaxin паказала эфектыўнасць у 81%
- 4.03.2021, 20:18
- 1,930
У першы дзень сакавіка вакцынай прышчапіўся прэм'ер Індыі ў спробе супакоіць асцярогі вакол прэпарата.
Распрацаваная Індыяй вакцына супраць каранавіруса Covaxin (коваксін), якая выклікала спрэчкі пасля яе адабрэння для прымянення ў экстранным парадку да завяршэння клінічных выпрабаванняў, паказала высокую эфектыўнасць ад ковіда падчас прамежкавага аналізу падоўжанага клінічнага выпрабавання, паведамляе Bloomberg.
Вакцыну распрацавалі хайдарабадская кампанія Bharat Biotech і Індыйская рада ў медычных даследаваннях.
Covaxin паказала ўзровень эфектыўнасці 81% у тых, хто не хварэў ковідам. Добраахвотнікам рабілі па дзве прышчэпкі, кажуць у кампаніі.
Нягледзячы на тое, што ў студзені вакцына атрымала дазвол на экстраннае выкарыстанне, многія з тых, каго ўключылі ў спіс прыярытэтных для атрымання першых прышчэпак, не прыйшлі на вакцынацыю, баючыся, што ім могуць даць эксперыментальную вакцыну.
Афіцыйныя асобы ў Нью-Дэлі і кіраўніцтва кампаніі Bharat Biotech актыўна абаранялі бяспеку і эфектыўнасць вакцыны падчас яе ўкаранення.
Прэм'ер-міністр Нарэндра Модзі таксама прышчапіўся гэтай вакцынай 1 сакавіка ў спробе супакоіць асцярогі вакол вакцыны і заклікаў індыйцаў зрабіць такі ж крок.