У Бразіліі расследуюць продаж трапічных лясоў праз Facebook

Частка гэтых лясоў належыць карэнным народам Бразіліі.

Вярхоўны суд Бразіліі распарадзіўся правесці расследаванне продажу ахоўных тэрыторый трапічных лясоў Амазонкі праз Facebook. Аб гэтым піша BBC.

Аб'явы аб продажы дзялянак памерам да тысячы футбольных палёў, частка якіх належыць карэнным народам краіны і мае статус ахоўных тэрыторый, былі выстаўленыя на платформе Marketplace і ў Facebook. На рэкламныя аб'явы звярнулі ўвагу журналісты BBC, яны накіравалі скаргу сацсетцы і атрымалі адказ аб тым, што ў Facebook не могуць спыніць рэкламу, але гатовыя супрацоўнічаць з уладамі Бразіліі.

Суддзя Вярхоўнага суда краіны Луіс Раберта Барозу папрасіў генеральнага пракурора і міністэрства юстыцыі расследаваць высновы BBC.

Кіраўнік камісіі па навакольным асяроддзі сената Бразіліі Жак Вагнер назваў угоды з зямлёй злачыннымі. Ён паабяцаў ініцыяваць зварот у Facebook з патрабаваннем перагледзець палітыку размяшчэння рэкламы.

Паводле інфармацыі BBC, бразільскія абаронцы прыроды абвінавацілі прэзідэнта краіны Жаіра Балсанару ў тым, што ён падтрымліваў высечку трапічных лясоў.

Маштабы вырубкі лясоў Амазоніі дасягнулі максімуму з 2008 года. Пра гэта ў лістападзе 2020 года абвясціў тэлеканал Globo. Са жніўня 2019 года да ліпеня 2020 года ў Амазоніі высеклі больш за 11 тыс. км² лесу. Гэта на 9,5% больш, чым за аналагічны перыяд 2019 года.