У Ерэване ідуць масавыя пратэсты супраць Нікола Пашыняна

Пратэстоўцы знаходзяцца на цэнтральным праспекце Ерэвана дзень і ноч.

У сталіцы Арменіі Ерэване ў суботу, 6 сакавіка, адбыўся чарговы масавы мітынг супраць кіраўніка ўрада краіны Нікола Пашыняна. Пад 10 гадзін раніцы мясцовага часу пратэстоўцы сабраліся ля размешчанага ўдалечыні ад цэнтра горада будынка Міністэрства абароны, каб выказаць сваю падтрымку начальніку Галоўнага штаба УС Оніку Гаспарану, адстаўкі якога з канца лютага дамагаецца Пашынян, піша dw.com.

Паводле ацэнкі журналістаў лік сабраных ля міністэрства абароны дасягаў 3000 чалавек. У руках яны трымалі плакаты з такімі лозунгамі, як "Нікол - здраднік", "Здрадніка - у адстаўку!" і "Няхай жыве войска Арменіі!"

Мітынг на праспекце Баграмяна ў Ерэване

Пад поўдзень пратэстоўцы накіраваліся маршам да праспекта Баграмяна, на якім размешчаная рэзідэнцыя прэзідэнта Арменіі, будынак урада краіны, а таксама пасольствы шэрагу замежных дзяржаў. Праз несціханыя антыўрадавыя пратэсты гэты цэнтральны праспект Ерэвана ўжо восьмы дзень перацяты для руху аўтамабіляў.

Пратэстоўцы знаходзяцца на ім дзень і ноч. Удзень яны паляць вогнішчы ў спецыяльна адведзеных для гэтага месцах, а ночы праводзяць у намётах. Валанцёры раздаюць прысутным гарачую гарбату. Сілы правапарадку працуюць тут ва ўзмоцненым рэжыме: каля праспекта прыпаркаваныя дзясяткі аўтобусаў з паліцыянтамі. Аднак яны не ўмешваюцца ў падзеі, бо пратэст праходзіць мірна.

У мітынгу, які адбыўся на праспекце Баграмяна 6 сакавіка пад 15 гадзін мясцовага часу, паводле назіранняў карэспандэнта DW узялі ўдзел блізу 10 тысяч чалавек, у тым ліку удзельнікі ранішняй акцыі ля Мінабароны, якія падцягнуліся туды пад гэты час. Нягледзячы на мірны характар акцыі, некаторыя яе ўдзельнікі заклікалі прысутных пачаць дзейнічаць "больш актыўна", каб дамагчыся адстаўкі Нікола Пашыняна.

Спробы Пашыняна дамагчыся адстаўкі начальніка Галоўнага штаба Узброеных сіл

Сітуацыя ў Арменіі абвастрылася 25 лютага, пасля таго як Галоўны штаб УС выдаў заяву з патрабаваннем вызваліць Пашыняна ад пасады кіраўніка ўрада краіны. За дзень да гэтага, 24 лютага, прэзідэнт Арменіі Армэн Саркісян падпісаў указ аб адстаўцы Тыграна Хачатрана з пасады першага намесніка начальніка Галоўнага штаба УС краіны. Прэсавая служба прэзідэнта Арменіі паведаміла тады, што гэты ўказ быў падпісаны кіраўніком дзяржавы на прапанову Нікола Пашыняна.

25 лютага Пашынян накіраваў прэзідэнту краіны хадайніцтва аб вызваленні ад пасады начальніка Галоўнага штаба УС Оніка Гаспарана, аднак Армэн Саркісян такі ўказ не падпісаў, вярнуўшы яго ўраду.

28 лютага прэм'ер Пашынян паўторна накіраваў прэзідэнту Арменіі хадайніцтва аб вызваленні ад пасады Гаспарана. Аднак 2 сакавіка Саркісян прыняў пастанову не падпісваць гэты дакумент. Пасля гэтага прэсавая служба прэзідэнта Арменіі паведаміла, што Армэн Саркісян звярнуўся ў Канстытуцыйны суд краіны - аднак не з просьбай спраўдзіць канстытуцыйнасць указа аб адстаўцы начальніка Галоўнага штаба УС, а з пытаннем пра канстытуцыйнасць закона аб статусе вайскоўца.