Жыхары Мазыра злавілі мясцовага чыноўніка на хлусні пра дзіцячыя пляцоўкі

Пляцовак няма, а іх фота намеснік старшыні райвыканкама дэманструе.

У Мазыры чыноўнік трапіўся на хлусні пра дзіцячыя пляцоўкі, паведамляе «Еўрарадыё». Фелікс Галюк, намеснік старшыні Мазырскага райвыканкама, у адказ на адзін з запытаў даў справаздачу аб заканчэнні ўладкавання трох спартыўных пляцовак на вуліцах Нафтабудаўнікоў, Пралетарскай і бульвара Дружбы ў 2020 годзе. Але пляцоўкі не дабудаваныя і ў эксплуатацыю не ўведзены дагэтуль!

Аўтары запыту абураныя. У тэлеграм-канале «Совет г. Мозырь» яны размясцілі фота «дабудаванай» спартыўнай пляцоўкі.

Пазіцыю грамадзян нечакана падтрымала інспекцыя Дэпартамента кантролю і нагляду за будаўніцтвам Гомельскай вобласці. У адказе на скаргу ведамства пацвердзіла, што «аб'екты не ўведзены ў эксплуатацыю ва ўстаноўленым заканадаўствам парадку», а «якасць выкананых работ характарызуецца як нездавальняючая».

З гэтым адказам мазыране звярнуліся ў Камітэт дзяржкантролю. Яны патрабуюць прыцягнуць Галюка да адміністрацыйнай адказнасці. З афіцыйнага адказу ведамства вынікае, што там не ўпэўненыя, што дзеянні чыноўніка падпадаюць пад КоАП. Ім прапанавалі звярнуцца ў органы крымінальнага пераследу.

Камітэт дзяржкантролю мяркуе, што чыноўнік парушыў артыкул 204 КК РБ: «Выдаванне грамадзяніну няпоўнай або наўмысна скажонай інфармацыі, якая пацягнула прычыненне істотнай шкоды правам, свабодам і законным інтарэсам грамадзяніна». Санкцыі артыкула прадугледжваюць штраф або пазбаўленне права займаць пэўныя пасады.

КДК таксама даў справаздачу перад заяўнікамі, што Гомельскаму абласному выканаўчаму камітэту было прапанавана прыцягнуць да адказнасці вінаватых службовых асоб Мазырскага райвыканкама за падаванне несапраўднага адказу.