Кошты нафты абрынуліся

Шлях з максімумаў за месяц да мінімуму за тыдзень заняў лічаныя гадзіны.

Кошты нафты нечакана рэзка пакаціліся ўніз на вячэрніх таргах у аўторак.

Раніцай ф'ючэрсы на гатунак Brent, якія дасягалі максімумаў за месяц вышэй за 68 даляраў за барэль, спікіравалі да мінімуму за тыдзень пасля адкрыцця біржаў у ЗША, паведамляе finanz.ru.

За паўгадзіны пры адсутнасці значных навін катыроўкі аселі на 3% і да 17.59 паводле Менску былі на адзнацы 65,51 даляр за бочку.

Кантракты на WTI, апоўдні каштавалі 64,3 даляра за барэль, абрынуліся на 3 даляры і сышлі ў мінус адносна закрыцця панядзелка. На 20.39 паводле Менску Brent прадаецца па 66,41 даляра (-0,94%), WTI - па 62,48 даляра (-1,5%).

«Кошт нафты падае разам з рызыкоўнымі актывамі ў цэлым», - канстатуе галоўны стратэг у сыравінных рынках TD Securities Барт Мелек.

Таргі ў ЗША пачаліся зніжэннем S&P 500 на 0,9% другі дзень запар, у той час як еўрапейскія біржы закрыліся ў мінусе на 1,5-2,4%, а Euro Stoxx 50 абнавіў мінімум за тыдзень.

Новыя «штамы (каранавіруса) лютуюць у асобных эканоміках», у Індыі колькасць хворых перавышае 200 тысяч у дзень, а гэта робіць «незразумелым далейшае развіццё сітуацыі з попытам» на сыравіну, адзначае Мелек.

За апошні год, нягледзячы на пандэмію, капіталізацыя глабальных рынкаў акцый амаль падвоілася і дасягнула 112 трлн даляраў, на чвэрць перавышаючы сусветны ВУП. Але рынак «крыху забег наперад», кажа Дэйв Сякера, галоўны стратэг Morningstar Investment Services, паводле ацэнкі якога акцыі ЗША пераацэнены на 5%.

Шэраг інвестараў ужо спяшаюцца зафіксаваць прыбытак ад ралі, які сілкуе друкаваныя станкі цэнтрабанкаў. Паводле звестак Bank of America, яго кліенты на мінулым тыдні вывелі з амерыканскіх акцый 5,2 млрд даляраў, у той час як індэксы штурмавалі гістарычныя максімумы. Продажы сталі рэкорднымі з лістапада мінулага года і ўвайшлі ў топ-5 па аб'ёме за ўсю гісторыю звестак. Рынак быў у пастцы ўласных гіпертрафаваных чаканняў. «Аптымізм пачаў зашкальваць, а прагнозы ў прыбытках ужо цалкам улічаны ў цэнах на бягучых узроўнях, так што любы вынік, акрамя абсалютна бліскучага стане негатыўным сюрпрызам», - кажа Марыас Хаджыкірыакас, аналітык XM Broker.