Дыетолагі распавялі, ці карысна камбінаваць шашлык з кетчупам або маянэзам

Карысныя парады на травеньскія святы.

Лекар-дыетолаг Вольга Аўчыннікава дае некалькі парад тым, хто сабраўся на шашлыкі - і клапоціцца пра сваё здароўе, піша сайт tut.by.

Выбірайце нятлустае мяса або рыбу

Калі не хочаце пераесці на прыродзе, бярыце з сабой менш каларыйныя варыянты мяса - курынае філе, шашлык з індычкі, цяляціны. Шашлык са свініны будзе больш тлустым і каларыйным.

Добрай альтэрнатывай на прыродзе будзе рыба, напрыклад ласось. Так, такі варыянт таксама змяшчае даволі шмат тлушчаў (8 г на 100 г прадукту), але пры гэтым у 100 г яго ўтрымліваецца 20 г высакаякаснага бялку і частка тлушчаў, якія ўваходзяць у склад ласося, належаць да класа амега-3 поліненасычаных тлустых кіслот. А яны не сінтэзуюцца ў нас у арганізме і павінны ў абавязковым парадку паступаць з ежай.

Паспрабуйце абысціся без маянэзнага марынаду

Калі самі марынуеце мяса і гародніну, не выкарыстоўвайце маянэз. 100 г маянэзу - гэта дадатковыя 630 ккал (для параўнання: плітка малочнага шакаладу вагой 100 г - гэта 550 ккал). Маянэз значна «абцяжарвае» страву. Акрамя калорый, у гэтым прадукце ўтрымліваецца шмат солі, што неспрыяльна для людзей з захворваннямі нырак, падаграй і з павышаным артэрыяльным ціскам. У маянэзе таксама могуць прысутнічаць транстлушчы, якія аказваюць неспрыяльны ўплыў на ўзровень халестэрыну і павялічваюць рызыку захворванняў сардэчна-сасудзістай сістэмы.

У краме можна знайсці нядрэнны варыянт марынаванага мяса

У крамах прапануюць шмат гатовых варыянтаў мяса для выезду на прыроду. Адзін з іх - каўбаскі. Яны, напэўна, вельмі смачныя, але ў сваім складзе, як правіла, ўтрымліваюць шмат тлушчу і, адпаведна, калорый. Пры гэтым у іх будзе адносна мала бялку ў параўнанні з кавалкам мяса ці птушкі. Акрамя таго, для падрыхтоўкі каўбасак можа выкарыстоўвацца не толькі кавалачнае мяса, але і мяса механічнай абвалкі(а яно валодае меншай каштоўнасцю, чым кавалачнае, у яго складзе маюцца аскепкі касцяной тканкі, шмат калагену, які не ўтрымлівае ўвесь спектр незаменных амінакіслот).

Гатовы шашлык на фоне каўбасак больш карысны варыянт. Напрыклад, у крамным шашлыку з курыцы я знайшла такі склад: кураня, маянэз, соевы соус і заправа для курыцы. Пры гэтым ёсць крамы, дзе мяса марынуюць без маянэзу, - гэта ідэальны варыянт. Купляючы любы прадукт, не забывайце чытаць яго склад.

Не ператрымліваць мяса на агні

У асмаленых кавалках мяса няма карысці: у працэсе гатавання на адкрытым агні могуць утварацца злучэнні, якія шкодныя для здароўя (гэта поліцыклічныя араматычныя вуглевадароды, гетэрацыклічныя араматычныя аміны і акрыламід).

Па магчымасці старайцеся гатаваць мяса больш ашчадным чынам. Пры гэтым не забывайце пра такі момант: даданне прыправаў - кары, імбіру - дапамагае значна знізіць колькасць шкодных рэчываў у мясе, якое гатуецца на адкрытым агні. Таму спецыі ў шашлык - гэта карысна.

Спалучайце шашлык з правільнымі прадуктамі

Калі вы імкнецеся схуднець, то лепш не дапаўняць шашлык бульбай, а таксама запечаным сырам у лавашы. Вазьміце за правіла з'ядаць разам з ім талерку салаты з гародніны і зеляніны: будзе і карысць за кошт вітамінаў, мінералаў і клятчаткі з гародніны, і пачуццё насычэння, якое дапаможа не пераесці.

Што тычыцца соусаў, то частыя камбінацыі - гэта мяса з маянэзам або кетчупам. Кетчуп менш калорый, чым маянэз. У 100 г маянэзу - больш за 600 ккал, а ў 100 г кетчупа - менш за 100 ккал. У крамах можна знайсці кетчуп з нармальным складам: вада, таматная паста, цукар, соль, воцат, лук, часнык, спецыі. Выбіраючы паміж кетчупам і маянэзам, я б аддала перавагу першаму.

Не захапляйцеся алкаголем

Алкаголь значна адбіваецца на каларыйнасці вашага прыёму ежы. 1 г спірту змяшчае 7 ккал, адпаведна, чым мацнейшы напой, тым ён больш каларыйны. Найбольш небяспечныя салодкія алкагольныя кактэйлі і мацаваныя салодкія слабаалкагольныя напоі: яны каларыйныя і за кошт крэпасці алкаголю, і за кошт дададзенага цукру. Не варта забываць, выпіты алкаголь яшчэ і павялічвае верагоднасць страціць кантроль і пераесці.