У Горадні 9-гадовы хлопчык атрымаў траўму рукі падчас выступу вайскоўцаў

У час мерапрыемства былі запушчаны дымавыя шашкі.

Каля Кургана Славы ў Горадні ў Дзень Перамогі было свята, з паказальнымі выступленнямі вайскоўцаў. Чытачка распавяла tut.by, што яе дзевяцігадовы сын атрымаў траўму рукі «падчас запуску дымавых шашак».

Мяркуючы па святочнай праграме, з 11.40 да 13.45 каля Кургана Славы праходзіў канцэрт духавога аркестра 6-й механізаванай брыгады і творчых калектываў Гарадзенскага гарадскога цэнтра культуры. Мясцовыя СМІ паведамляюць, што вайскоўцы паказалі вайсковую тэхніку, некалькі выступаў, а потым частавалі салдацкай кашай.

Жыхарка Горадні Анастасія была на свяце з дзевяцігадовым сынам.

- Глядзелі паказальнае выступленне нейкіх вайскоўцаў. Яны паказвалі, як умеюць страляць, запускалі нейкія дымавыя шашкі, былі чутны «выбухі». З выступоўцаў запомніўся хлопец у незвычайнай камуфляванай вопратцы - «у лахманах», ён быў бліжэй за ўсё да нас.

Анастасія кажа, што пусціла дзіця бліжэй да агароджы (за яе ён не заступаў), у першы шэраг - каб яму было лепш відаць.

- Мяне ад сына адлучала прыкладна тры шэрагі людзей. Я не выпускала з поля зроку яго куртку. У нейкі момант «выбухі» пачуліся бліжэй. Я заўважыла, што дарослыя сталі адводзіць з першых шэрагаў маленькіх дзяцей - яны заплакалі. Маё дзіця таксама стала адыходзіць. Падышла бліжэй - паказвае руку і плача, - распавядае маці. - Я павяла яго ў найбліжэйшую хуткую дапамогу, там рану апрацавалі і сказалі, што гэта апёк.

Хлопчык маці растлумачыў, што адчуў толькі рэзкае паленне ў руцэ падчас паказальнага выступу вайскоўцаў.

Жанчына кажа, што спрабавала знайсці ля Кургана Славы адказных за мерапрыемства, але нічога не выйшла.

Бліжэй да вечара сям'я з'ездзіла ў траўмапункт Гарадзенскай абласной дзіцячай клінічнай бальніцы і зафіксавала здарэнне. У даведцы (ёсць у рэдакцыі) указана, што ў хлопчыка выцятая рана правай кісці. Там жа пазначана: «Паведамлена ва УУС».

Анастасія занепакоеная тым, што адбылося.

- Там былі дзеці ніжэйшыя за майго ростам. А калі б штосьці трапіла іншаму дзіцяці ў вока? Магчыма, гледачоў не адвялі на дастатковую адлегласць? Гэта небяспечна. Крыўдна, што такі цудоўны дзень быў азмрочаны. Іншым разам я падумаю, ісці ці не ісці на свята.

Бацькі хлопчыка тлумачаць, што ў іх прэтэнзій няма, але хацелі б адчуваць сябе ў бяспецы пры правядзенні такіх мерапрыемстваў.

У Міністэрстве абароны журналістам пакуль не ўдалося атрымаць каментар. Звязацца з арганізатарамі святочных мерапрыемстваў таксама не ўдалося.

Журналісты таксама пагутарылі і з іншымі бацькамі, што былі на свяце. Яны адзначылі, што было шумна і занадта блізка да гледачоў, магчыма праз гэта некаторыя дзеці, спалохаўшыся, заплакалі.