«Такіх чэргаў не было нават за айфонамі!»

Менчукі штурмуюць бясплатны цэнтр вакцынацыі ў Expobel.

Цэнтр вакцынацыі ў Expobel, пра які мы пісалі раней, усё ж адкрыўся. Тады было шмат пытанняў, нават арганізатара і вакцыну не называлі. Заслона таямніц і загадак сёння была знятая, піша onliner.by.

Тут атрымаць запаветны укол можна без запісу, але адстаяць пару гадзін (мінімум дзве) давядзецца. Чарга расцягнулася на ўвесь другі паверх гандлёвага цэнтра. А хтосьці з наведвальнікаў прымеціў: «За «айфонамі» людзей прыходзіла менш, чым на вакцынацыю».

Цэнтр адкрыўся б і раней, але чакалі вакцыну, ехала два дні. Прывезлі 1000 доз першага кампанента «Спутнік V» беларускага разліву, які захоўваюць у лядоўні і размарожваюць за 10-20 хвілін. Усё як у паліклініцы. Другі кампанент абяцаюць падвезці пазней і калоць яго будуць толькі тым, хто прывіваўся непасрэдна ў цэнтры. Ад паліклінік тут і лекары, якія ўколы уласна і робяць, а таксама дапамагаюць запоўніць анкету і праводзяць медагляд. Пасля ўвядзення вакцыны пацыенты павінны назірацца на працягу 30 хвілін, каб лекар мог пераканацца, што з імі ўсё добра.

Для атрымання вакцыны з сабой дастаткова мець пашпарт і, прыкладна, тры гадзіны вольнага часу - менавіта столькі чакалі людзі, якія занялі чаргу з 10 раніцы. Такога ажыятажу не чакаў і кіраўнік гандлёвага цэнтра Андрэй Гоман.

- Мы самі не чакалі, што будзе столькі ахвочых, цяжка сказаць, чаму людзі больш ахвотна ідуць у наш цэнтр, чым у родныя паліклінікі. Думаю, гэта звязана з тым, што ім так зручней. У паліклініках жа часцяком людзі баяцца, бо там шмат хворых, а тут больш спакойная абстаноўка. Стварэнне гэтага цэнтра - цалкам наша ініцыятыва, мы прапанавалі ў Мінаблвыканкам сваю ідэю, там яе падтрымалі, а Міністэрства аховы здароўя ўжо падала супрацоўнікаў і саму вакцыну. Самі медыкі з Менскай цэнтральнай раённай клінічнай бальніцы, для іх гэта як звычайны працоўны дзень, толькі іншае памяшканне. Што тычыцца ідэі з ПЦР-тэстамі, то пакуль яна перайшла на другі план, вакцынацыя насельніцтва - больш прыярытэтная задача, - распавядае Андрэй Гоман.

Даведацца аб наяўнасці вакцыны і маштабе чаргі можна па тэлефоне: (8 017) 221-30-82. Цэнтр вакцынацыі працуе з 9 да 21.

«Не мылася, адразу на ўкол пабегла з бруднай галавой»

Мы пагутарылі з людзьмі з чаргі, усяго іх налічылі блізу 70 чалавек, і даведаліся, чаму людзі гатовыя прастаяць свой выходны. Святлана апошняя, але гатовая стаяць да канца.

- Я ўжо блізу месяца чакаю вакцыну ў сваёй паліклініцы, хадзіла да старэйшай медсястры, але яна разводзіць рукамі. Была 701-я па запісу, а потым вакцына скончылася. Але тут, вы бачыце, таксама фармат не вельмі, гэта грамада людзей. Калі б гэтыя дозы размеркавалі па паліклініках, то для людзей было б значна больш бяспечна, але тут ёсць магчымасць атрымаць укол тым, хто вельмі-вельмі хоча. Хоць пакуль незразумела, як чарга рухаецца, трэба было да 10 ісці ўсё ж, - распавядае Святлана.

Наступны наш суразмоўца бліжэй да вакцыны, чым Святлана. Час забівае з дапамогай смартфона, так тут робіць кожны.

-У маёй паліклініцы ў чацвер заставалася толькі кітайская вакцына і другі кампанент «Спутнік V». Тут не пытанне выгоды, а пытанне наяўнасці вакцыны, яе ж нідзе няма. Вось учора напісалі ў СМІ, што будуць прывіваць, я і прыехаў. Стаю з 10 раніцы, - распавядае хлопец.

Канстанцін прыехаў у гандлёвы цэнтр з жонкай і дзіцем да 10 раніцы і застаў чаргу ў яе зародках. Стаіць ужо тры гадзіны.

- Спачатку было блізу 15 чалавек, затым чарга разраслася, каб не перашкаджаць наведвальнікам, у бок ліфта. Я дзесьці са снежня шукаў спосабы, запісаліся з жонкай у сваю паліклініку, але ніхто не паклікаў дагэтуль, таму вырашылі прыйсці сюды. Мой знаёмы прыйшоў на 10 хвілін раней за мяне, і за гэты час паміж намі чарга ў чалавек 10. Так, тут небяспечна, але больш і няма дзе зрабіць укол, - распавядае Канстанцін.

Пакуль у людзей яшчэ не з'явілася ідэя прадаваць месцы ў чарзе, а спробы «толькі спытаць» тут не працуюць. Жанчына, якая толькі атрымала укол распавядае, што не выдаткавала ў чарзе ні хвіліны, але як?

- Я ганаровы донар, таму змагла зрабіць укол без чаргі, першы раз у жыцці скарысталася гэтым прывілеем. Сёння 1000 доз прывезлі, але ва ўсіх жа паліклініках нічога няма, таму я прыбегла з бруднай галавой, не буду мыцца, абы зрабіць прышчэпку. Паўторна запрасілі на 28 траўня, праз 21 дзень. Даведку паабяцалі потым зрабіць. Самае галоўнае, што калі нешта падхопім, будзем хварэць не так, як раней, - робіць высновы ганаровы донар.