Аляксандр Старыкевіч: Пратасевіч пайшоў на ўгоду з уладамі

Для гэтага пасажыра рэйса Афіны-Вільня не абавязкова было катаваць.

Відавочны вывад з панядзелкавай прэс-канферэнцыі ў тым, што Раман Пратасевіч пайшоў на ўгоду з уладамі, піша журналіст Аляксандр Старыкевіч у артыкуле на сайце «Салідарнасць».

Прычым для гэтага знакамітага пасажыра рэйса Афіны-Вільня не абавязкова было катаваць. Цалкам магчыма Пратасевічу проста быў прапанаваны выбар:

- або ты і твая дзяўчына атрымліваеце ад 10 гадоў пазбаўлення волі;

- або ты пачынаеш скакаць пад дудку спецслужбаў, і тады вы абодва неўзабаве будзеце памілаваныя, а бонусам можаш зарабіць сабе мястэчка ў новай «канструктыўнай» апазіцыі яго вялікасці.

Ці многія ў гэтай сітуацыі выбралі б першае?

Таму не рэкамендую марнаваць час і эмоцыі на асуджэнне Пратасевіча. У той жа час вельмі наіўнымі выглядаюць спробы і далей прадстаўляць блогера ў якасці «закладніка», які свае заявы робіць ледзь не пад руляй пісталета.

Камсамольскі запал, з якім сябе паводзіў на прэс-канферэнцыі Пратасевіч, наглядна дэманструе, што ён уключыўся ў прапанаваную гульню з энтузіязмам. Хутчэй за ўсё, чалавек проста памяняў бок. Звычайная справа.

Калі б падобнае адбылося, напрыклад, (не дай Бог) з Паўлам Севярынцам, я б здзівіўся. Але калі перабежчыкамі аказваюцца ў агульным выпадковыя ў палітыцы людзі, наўрад ці варта здзіўляцца.

Так што, рамантычныя прапановы Пратасевічу «трымацца» былі запозненымі. Трэба проста прыняць новую рэальнасць, а не адмаўляць яе. Як мінімум, з двух прычын:

1. З высокай доляй верагоднасці можна прагназаваць, што 14 чэрвеня адбылося не апошняе шоў Пратасевіча. Працягваючы выкарыстоўваць яго ў якасці «сцяга», апаненты ўлады проста падстаўляюцца пад чарговыя ўдары.

2. За кратамі цяпер знаходзіцца велізарная колькасць людзей, якія заслугоўваюць увагі. Але ў апошнія тыдні фокус быў зусім непрапарцыйна засяроджаны на адным чалавеку. Юлія Слуцкая, Віктар Бабарыка, Вольга Залатар і яшчэ вельмі-вельмі многія былі ў цені Рамана Пратасевіча, хоць заслугоўваюць нашага ўдзелу дакладна не ў меншай ступені. Давайце ліквідуем гэты перакос.