Польскія памежнікі затрымалі дзве групы нелегальных мігрантаў з Беларусі
9- 18.06.2021, 15:23
- 10,836
Затрыманыя - грамадзяне Афганістана.
Афіцэры Падляшскага памежнага атрада (Польшча) затрымалі дзве групы нелегальных мігрантаў, якія перасеклі польска-беларускую мяжу з парушэннем закона, паведамляе Польская служба аховы мяжы.
Затрыманыя - грамадзяне Афганістана.
Патруль памежнага паста ў сяле Крынках каля горада Азяранаў выявіў сляды пераходу мяжы з Беларусі ў Польшчу па памежнай дарозе. За некалькі кіламетраў ад мяжы памежнікі затрымалі групу з 11 замежнікаў (6 мужчын ва ўзросце ад 15 да 49 гадоў і 5 жанчын ва ўзросце ад 9 да 47 гадоў). Выявілася, што гэта афганскія грамадзяне, якія пешшу перасеклі зялёную мяжу. Пасля выканання неабходных дзеянняў у прысутнасці перакладчыка замежнікі на пастанову суда былі змешчаныя ў ахоўныя цэнтры для замежнікаў у Кентшыне і Беластоку.
Іншая група была арыштаваная ў Саколцы. Супрацоўнікі памежнага паста ў Кузніцы, супрацоўнічаючы з паліцыянтамі з Саколкі, затрымалі 11 грамадзян Афганістана. Замежнікі ва ўзросце ад 18 да 45 гадоў прызналіся ў незаконным перасячэнні польска-беларускай мяжы. Затрыманыя на пастанову суда будуць змешчаныя ў ахоўныя цэнтры для замежнікаў.
Нагадаем, што апошнім часам значна вырасла нелегальная міграцыя з Беларусі ў Літву. Паводле інфармацыі МУС Літвы, з пачатку гэтага года былі затрыманыя 392 чалавекі з трэціх краін, якія незаконна перасеклі мяжу Літвы з Беларуссю. З 1 да 16 чэрвеня гэтага года незаконна мяжу перасеклі 204 мігранты.
Міністр унутраных спраў Літвы Агне Білатайтэ звярнулася ў Генпракуратуру ў сувязі з падазрэннямі ў арганізацыі беларускімі ўладамі незаконнага правозу людзей з Беларусі.