16 верасня 2021, Чацвер, 14:20
Сім сім, Хартыя 97!
Рубрыкі

Уханьская лабараторыя ўскладняе пошук крыніцаў пандэміі COVID-19

2
Уханьская лабараторыя ўскладняе пошук крыніцаў пандэміі COVID-19

Кітайскія чыноўнікі перашкаджаюць расследаванню.

«У траўні 2019 года супрацоўнікі Уханьскага інстытута вірусалогіі адправіліся ў старамодную лекцыйную залу. На трыбуне быў мясцовы прадстаўнік Нацыянальнай адміністрацыі Кітая ў ахове дзяржаўных таямніцаў. Чыноўнік Тан Кайхун казаў пра рызыкі для нацыянальнай бяспекі, звязаныя з даследаваннямі інстытута, і папярэдзіў пра спробы пранікнення замежных шпіёнаў, паводле справаздачы, апублікаванай галаўной арганізацыяй інстытута, Кітайскай акадэміяй навук. Даследнікі падпісалі абавязальніцтвы ў абароне канфідэнцыйнай інфармацыі», – паведамляе The Washington Post (пераклад – inopressa.ru).

«Уханьская лабараторыя звярнула ўвагу сусветнай супольнасці праз даследаванні каранавірусаў кажаноў, якія праводзіліся ў горадзе, дзе пачалася пандэмія. Гэтыя падзеі пралілі святло на даследчую нішу, дзе – у Кітаі, ЗША і іншых краінах – праца вядзецца з падвышанай таемнасцю праз рызыкі для нацыянальнай бяспекі, звязаныя са смяротнымі патагенамі», – гаворыцца ў артыкуле.

«Агляд агульнадаступных дакументаў і ўнутраных правілаў лабараторыі сведчыць пра наяўнасць неўдакладненых засакрэчаных праектаў і абмеркаванняў абавязкаў лабараторыі ў адпаведнасці з кітайскім заканадаўствам аб дзяржаўнай таямніцы. У некаторых запісах згадваюцца пратаколы раскрыцця інфармацыі замежнікам і закрыццё некаторых справаздачаў аб даследаваннях на тэрмін да двух дзесяцігоддзяў», – паведамляе газета.

«Таемнасць можа дапамагчы растлумачыць, чаму спробы пацвердзіць або аспрэчыць тэорыю паходжання пандэміі праз лабараторную выцечку не мелі вялікага поспеху. Прэзідэнт Байдэн загадаў выведвальным агенцтвам ЗША падвоіць намаганні для вызначэння крыніцы вірусу – менавіта да такой аперацыі лабараторыя ва Ухані рыхтавалася больш за дзесяць гадоў таму, усталяваўшы сістэмы працы з канфідэнцыйнай інфармацыяй», – гаворыцца ў артыкуле.

«Захады засцярогі не азначаюць, што лабараторыя мае нейкае дачыненне да паходжання вірусу або што ў яе засакрэчаных праектах ёсць нешта зламыснае. Злучаныя Штаты таксама праводзяць таемныя даследаванні патагенаў і патрабуюць, каб супрацоўнікі лабараторый з высокай ступенню абароны праходзілі праверку добранадзейнасці», – падкрэсліваецца ў публікацыі. (...)

«Многія заходнія навукоўцы аддаюць перавагу тэорыі пра тое, што пандэмія пачалася ў прыродзе, мяркуючы гэта найпрасцейшым тлумачэннем. Але яны прызнаюць, што аварыі ў лабараторыях здараюцца часта. У 2019 годзе толькі ў Злучаных Штатах, згодна з гадавой справаздачай Федэральнай праграмы асабліва небяспечных патагенаў, было зарэгістравана 219 выпадковых выкідаў "асабліва небяспечных патагенаў" – смяротных вірусаў або таксінаў – і 13 згубленых узораў. Невядома, як часта такія аварыі адбываюцца ў кітайскіх лабараторыях. У 2004 годзе кітайскія органы аховы здароўя прызналі, што няшчасны выпадак у лабараторыі выклікаў лакальны ўсплёск атыповай пнеўманіі, праз год пасля таго, як эпідэмія была ў значнай ступені стрыманая».

«Пакуль не з'явілася ніякіх доказаў, якія супярэчаць сцвярджэнням уханьскіх навукоўцаў пра тое, што яны не сутыкаліся з COVID-19 да пандэміі і што ў лабараторыі не было няшчасных выпадкаў», – указвае газета.

(...) «У студзені Дзярждэпартамэнт ЗША заявіў, што Уханьская лабараторыя працавала над таемнымі праектамі, уключаючы эксперыменты на жывёлах, з кітайскімі вайскоўцамі сама менш з 2017 года. The Washington Post не змагла пацвердзіць гэта незалежна, але знайшла агульнадаступныя запісы лабараторыі, якая працуе з лякарнямі кітайскіх узброеных сілаў у несакрэтных праектах распрацоўкі лекаў і прафілактыцы СНІДу, а таксама выпадках, калі супрацоўнікі лабараторыі згадвалі таемныя праекты ў інстытуце», – паведамляе выданне.

(...) «У сакавіку 2014 года Кітай абнавіў свае правілы выкарыстання Закона аб дзяржаўнай таямніцы, падаўшы практычныя рэкамендацыі для тых, чыя праца звязаная з канфідэнцыйнай інфармацыяй. Сярод новых патрабаванняў: утылізаваць састарэлае абсталяванне такім чынам, каб змешчаная ў ім інфармацыя ніколі не магла быць адноўленая. Тое, што магло быць стрыманай бюракратычнай працэдурай, набыло вялікі рэзананс, калі ў наступным месяцы прэзідэнт Сі Цзіньпін абвясціў нацыянальную бяспеку прыярытэтам, заявіўшы, што краіна сутыкаецца з ростам пагрозаў». (...)

«Паводле паведамлення на вэб-сайце Кітайскай акадэміі навук, у траўні 2014 года яе Уханьскае аддзяленне правяло сустрэчу для абмеркавання працы з канфідэнцыйнай інфармацыяй. Чэнь Пінпін, намесніца генеральнага дырэктара філіяла, сказала ўдзельнікам, што ім неабходна выконваць новыя правілы, у тым ліку тыя, якія тычацца лепшага кантролю персаналу ў таемных праектах і больш стараннага дакументазвароту. Мы павінны "стандартаваць абыходжанне са старымі дакументамі, каб катэгарычна не дапусціць трапляння матэрыялаў з канфідэнцыйнай інфармацыяй да грамадскасці», сказала яна.

«Пасля гэтага ў кастрычніку 2014 года было праведзенае навучанне больш як 60 супрацоўнікаў Уханьскай лабараторыі, якія былі чальцамі Камуністычнай партыі. Сяа Гэнфу, кіраўнік камітэта прыватнасці лабараторыі, абмеркаваў значэнне дзяржаўных таямніцаў і пратаколаў інстытута. "Ён паказаў, што праца ў забеспячэнні канфідэнцыйнасці звязаная з бяспекай партыі і краіны"», – гаворыцца ў зводцы, апублікаванай акадэміяй навук.

«Паводле словаў Джуда Бланшэта, эксперта ў кітайскай палітыцы з Вашынгтонскага Цэнтра стратэгічных даследаванняў, у 2018 годзе Сяа быў прызначаны партыйным сакратаром лабараторыі, што часта з'яўляецца самай уплывовай пасадай у кітайскай арганізацыі, нават калі фармальны кіраўнік нехта іншы. У онлайн-спісе кіраўнікоў лабараторыі Сяа займае другое месца пасля генеральнага дырэктара Вана Яньі. Пасада Сяа як партыйнага сакратара згадваецца толькі на кітайскім вэб-сайце лабараторыі, а ў ангельскай версіі ён пазначаны як намеснік генеральнага дырэктара».

«Падобна на тое, што Сяа пільна сачыў за каранавіруснымі даследаваннямі лабараторыі з моманту пачатку пандэміі: ён быў суаўтарам як мінімум 15 рэцэнзаваных артыкулаў, звязаных з новым каранавірусам, больш, чым Ван і іншыя кіраўнікі інстытута, паводле ResearchGate».

«У апошнія гады лабараторыя рэгулярна праводзіла трэнінгі ў пытаннях прыватнасці для персаналу, у тым ліку ў 2018 годзе, дзе спікеры абмяркоўвалі перадавы досвед пераводу даследнікаў у таемныя праекты і назад, рэкамендацыі ў паездках за мяжу для тых, хто ўдзельнічае ў важных праектах, і "кіраванне прыватнасцю пры прыёме іншаземцаў". Гэтае пасяджэнне адбылося праз некалькі месяцаў пасля візіту амерыканскіх дыпламатаў, якія адправілі ў Вашынгтон тэлеграму пра праблемы з бяспекай у інстытуце».

«Праца, звязаная з прыватнасцю, прадаўжалася ў лабараторыі з тых часоў, як пандэмія звярнула да яе ўвагу ўсяго свету, што падкрэслівае праблемы пры ацэнцы тэорыі лабараторных выцечак».

(...) «Увесну гэтага года лабараторыя раздала студэнтам формы для закрыцця доступу да дысертацый на канфідэнцыйныя тэмы. У адной з формаў гаварылася, што "канфідэнцыйныя" дысертацыі будуць закрытыя на тэрмін да 10 гадоў, а "сакрэтныя" – на тэрмін да 20 гадоў».

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».