Беларускія праваабаронцы ўганараваныя нямецкай прэміяй

Цырымонія ўзнагароджання пройдзе 28 лістапада.

Беларускі праваабарончы цэнтр «Вясна» атрымаў заахвочвальную прэмію імя Марыён Дэнхоф (Marion Dönhoff) з грашовым эквівалентам 20 тысяч еўраў за выдатны ўнёсак у падтрымку дэмакратыі і абарону грамадзянскіх правоў. Пра пастанову журы заснавальнікі прэміі паведамілі ў панядзелак, 26 ліпеня, паведамляе DW.

Асноўным лаўрэатам прэміі за садзейнічанне міжнароднаму ўзаемаразуменню і прымірэнню стаў 88-гадовы нямецкі юрыст і былы міністр унутраных спраў Герхарт Баўм (Gerhart Baum). У якасці кіраўніка дэлегацыі ФРГ у Камісіі правоў чалавека ААН (цяпер Рада правоў чалавека ААН) ён выступаў у абарону людзей, якія пакутуюць ад вайны ці якія апынуліся ў зоне баявых дзеянняў.

Галоўная прэмія таксама мае эквівалент 20 тысяч еўраў. Цырымонія ўзнагароджання пройдзе 28 лістапада.

Затрыманне Алеся Бяляцкага

15 ліпеня стала вядома, што кіраўнік праваабарончага цэнтру «Вясна» Алесь Бяляцкі затрыманы ў Беларусі ў межах крымінальнай справы, дэталі якой пакуль не агалошваюцца. У гэты дзень прайшлі ператрусы ў шэрагу праваабарончых арганізацый і былі затрыманыя яшчэ некалькі прадстаўнікоў «Вясны».

Прэмія Дэнхоф для Гарбачова

Прэмія імя вядомай нямецкай журналісткі Марыён Дэнхоф уручаецца з 2003 года фондам Zeit (Zeit-Stiftung), газетай Die Zeit і фондам імя Марыён Дэнхоф (Marion Dönhoff Stiftung). У 2010 годзе яе лаўрэатам стаў былы прэзідэнт СССР Міхаіл Гарбачоў.