Беларусам рэкамендуюць адмовіцца ад адпачынку ў Турцыі праз лясныя пажары або перанесці паездку
4- 31.07.2021, 20:16
- 5,504
Тым, хто знаходзіцца ў Турцыі, раяць не пакідаць гатэлі.
Беларускія дыпламаты рэкамендуюць суайчыннікам, якія знаходзяцца ў Турцыі ў зонах лясных пажараў, не пакідаць гатэлі. Тым, хто плануе свой адпачынак у гэтых рэгіёнах, раяць устрымацца ад паездкі - адмовіцца ад яе ці перанесці на іншую дату, піша zerkalo.io.
Нагадаем, на папулярных турэцкіх курортах у Мармарысе, Сідзе і Бодруме бушуюць лясныя пажары, ёсць загінулыя і пацярпелыя. Пажар пачаўся 28 ліпеня непадалёк ад горада Манаўгата ў турэцкай правінцыі Анталья. Паводле папярэдняй інфармацыі, прычынай узгарання стала моцная спёка ў рэгіёне.
Пасольства Беларусі ў Турцыі рэкамендуе нашым суграмадзянам, якія знаходзяцца ў пажаранебяспечных рэгіёнах, не пакідаць тэрыторыі гатэляў і пры ўзнікненні пазаштатных сітуацый строга выконваць указанні мясцовых уладаў і адміністрацыі гатэля. Таксама, варта сабраць рэчы з усім неабходным (дакументы, грошы, вада, харчаванне) на выпадак магчымай эвакуацыі, зарадзіць тэлефоны і іншыя прылады камунікацыі. Прапануецца паведаміць сваякам і сябрам пра сваё месца знаходжання і свае планы.
Для тых, хто плануе накіравацца на адпачынак у рэгіёны, пацярпелыя ад лясных пажараў, рэкамендуецца ўстрымацца ад паездкі: адмовіцца альбо перанесці тэрміны наведвання раёнаў Турцыі з ляснымі пажарамі.
Для атрымання экстранай дапамогі грамадзяне Беларусі, якія знаходзяцца ў Турцыі, могуць звязацца з супрацоўнікамі амбасады праз дзяжурныя тэлефоны (гэтыя нумары прызначаныя выключна для сувязі ў надзвычайных абставінах (пагроза жыццю і здароўю):
+90 (312) 441 6450
+90 (312) 441 6769
+90 (533) 708 8475
Пры адсутнасці адказу можна напісаць SMS.