Беларуску шакаваў адпачынак у Егіпце: Такога мы яшчэ не бачылі, гэта кашмар

Першае, чым пара засталася незадаволеная, гэта сам гатэль і яго сэрвіс.

Жыхарка Баранавічаў Юлія днямі вярнулася з Шарм-эль-Шэйха, дзе адпачывала разам з мужам. У Егіпет дзяўчына лётала ўпершыню, але гэты адпачынак, кажа яна, не забудзе ніколі, піша сайт Intex-press.

«Хацелася паглядзець на прыгожае Чырвонае мора»

Жыхарка Баранавічаў Юлія стараецца кожны год лётаць куды-небудзь адпачываць. Часцей за ўсё, кажа дзяўчына, яны з мужам праводзілі адпачынак у Турцыі. І заўсёды заставаліся задаволеныя. Але сёлета ўпершыню наважылі паляцець у Егіпет.

- Калі б не трэба было сядзець на карантыне па прылёце, мы б зноў паляцелі ў Турцыю. Але варыянт з карантынам нам не падыходзіў, таму мы наважылі выбраць Егіпет. Хацелася паглядзець на прыгожае Чырвонае мора, - успамінае Юлія.

Варыянт, які прапанавалі ў адным з баранавіцкіх турагенцтваў, мужа і жонку цалкам задаволіў: папулярны курорт, гатэль чатыры зоркі, усё ўключанае.

- На карцінцы было ўсё прыгожа. Але калі мы прыехалі, выявілася, што мэбля ў нумары ўся старая, пашарпаная. Дазатары на шампунь, гель для душа ўсе зламаныя. Кандыцыянер мала таго, што брудны, дык яшчэ і не працуе. А калі я патэлефанавала на рэсэпшн і паведаміла пра праблему, мне проста нагрубілі і павесілі слухаўку, - распавядае дзяўчына.

«Хто павінен вартаваць вашы крэслы?»

Першае, чым пара засталася незадаволеная, гэта сам гатэль і яго сэрвіс. Са слоў Юліі, нейкія бытавыя пытанні і непрыемныя сітуацыі ў іх узнікалі практычна штодня цягам усяго адпачынку.

- Прыкладна на пяты дзень, пакуль мы плавалі ў басейне, у нас скралі ручнік, якія выдаюць на лежакі. Сталі пытацца - ніхто нічога не бачыў. Я пайшла разбірацца, можа, відэакамеры якія ёсць. Мне сказалі: не, камер няма, плаціце 20 даляраў! Давялося зноў звязвацца з турагенцтвам, - успамінае Юлія. - Вечна былі нейкія напружаныя моманты. У нас ручнік скралі, у сяброў - крэсла з тэрасы. Хто павінен сядзець і пільнаваць вашы крэслы? Мы нават падумалі, што гэта нейкі тып мясцовага бізнэсу.

Акрамя таго, непазбыўнае ўражанне ў баранавіцкай пары пакінула святкаванне мусульманскага свята Курбан Байрам, адзначаць якое ў іх гатэль прылятала вялікая колькасць мясцовых вернікаў. Ад таго, што для ўсходняга менталітэту да месца і натуральна, нашы турысты выпрабавалі культурны шок.

- Гэтае свята нешта накшталт нашага Вялікадня. Святкуюць яго некалькі дзён. Людзі прыязджаюць цэлымі сем'ямі, збіраюцца за сталом, набіраюць шмат ежы, а ўсе адкіды - косткі ад рыбы, курыцы, што заўгодна - плююць проста на стол, на абрус. Потым пераходзяць за іншы стол і робяць тое ж самае. Назіраць за гэтым, мякка кажучы, не вельмі прыемна, для нас гэта было дзіка, - кажа Юлія, падкрэсліваючы, што ў турагенцтве яе не папярэджвалі ні пра што такое.

«У Егіпет больш не паеду»

Тур у Егіпет каштаваў баранавіцкай сям'і 1280 даляраў на дваіх. На думку гараджанкі, той адпачынак, які яны атрымалі, не варты выдаткаваных на яго грошай.

- У Турцыі некалькі разоў былі, ва Украіну ездзілі, па Беларусі шмат дзе. Але такога мы яшчэ не бачылі, гэта нешта. Пасля гэтай паездкі муж катэгарычна сказаў: «Больш у Егіпет не паеду, нават з-за мора», - кажа Юлія.

Жыхарка Баранавічаў наважыла распавесці сваю гісторыю рэдакцыю не для таго, каб паскардзіцца на канкрэтнае турагенцтва: наадварот, кажа яна, супрацоўнікі стараліся рабіць усё магчымае, каб развязваць узніклыя ў турыстаў праблемы.

Сваім прыкладам яна проста хоча папярэдзіць іншых турыстаў аб магчымых цяжкасцях і непрыемнасцях.

- Межы адкрылі, людзі засумавалі, але пасля Турцыі трэба карантын адседзець, з Украінай наогул усё незразумела, вось і паляцелі ўсе ў Егіпет. А там проста карыстаюцца сітуацыяй. Калі я сказала, што напішу дрэнны водгук на гатэль, мне адказалі: ну і што, усё адно прыедуць. Я хачу, каб людзі былі гатовыя да таго, што цяпер у Егіпце няма таго сэрвісу, як табе распісваюць, - адзначае Юлія. - Акрамя таго, я не ведала пра гэтыя святы, пра іх культуру. Хай народ будзе ў курсе, каб не сутыкацца з гэтым.