Беларус жорстка паставіў на месца міністра Піневіча
14- 18.09.2021, 18:29
- 50,902
Людзі абураныя тым, што ў краіне знікаюць імпартныя лекі, а тыя, што ёсць, каштуюць даражэй, чым у суседніх краінах.
Зноў прывітанне міністру аховы здароўя ад медыкаў. Тэлеграм-канал «Белыя халаты» апублікаваў ліст чытача:
«Чарговы раз назіраю звыклую для Беларусі дзею, калі чыноўнік займаецца не тым, чым абавязаны.
Цяпер у гэтай ролі выступае кіраўнік Міністэрства аховы здароўя Дзмітрый Піневіч, які так моцна занепакоіўся ўведзенымі санкцыямі, што забыўся, міністр чаго ён увогуле ў Беларусі і што ўвогуле краіну захліствае 4-я хваля пандэміі.
А з другога боку гэтыя ж людзі кажуць, што санкцыі “не працуюць”.
Тым не менш, паводле словаў кіраўніка міністэрства:
“Любыя эканамічныя санкцыі, перш за ўсё, уплываюць на сацыяльна-эканамічную палітыку. Сістэма аховы здароўя ў гэтым сэнсе, напэўна, найбольш адчувальная. У нас за апошнія гады склалася сістэма высокай даступнасці меддапамогі, наша візітная картка – гэта высокія тэхналогіі, ахова мацярынства і дзяцінства з найбольш нізкім паказнікам смяротнасці дзяцей. На гэта патрабуюцца вялізныя эканамічныя рэсурсы, якія накіроўваліся і будуць накіроўвацца. Новае абсталяванне і падрыхтоўка кадраў – гэта вымагае шмат рэсурсаў”.
Спрачацца з міністрам я не буду, таму проста задам пару пытанняў “рупліўцу” за дабрабыт насельніцтва:
Чаму Міністэрства аховы здароўя “страхуе” свае фармакампаніі, у выніку чаго ў краіне знікаюць імпартныя лекі, а тыя, што ёсць, каштуюць даражэй, чым у суседніх краінах?
Чаму ў краіне не былі ўведзеныя адэкватныя супрацькавідныя мерапрыемствы і нават не гучала заклікаў пра іх увядзенне?
Як так атрымалася, што ў краіне праз манапалізм “Белмедтэхнікі” кошт медыцынскай апаратуры на парадак вышэйшы, чым у сумежных краінах?
(Задаваць пытанні пра частыя паломкі апаратуры і чаканне рамонту некалькі месяцаў не буду, ужо надакучыла).
Чаму міністэрства ніяк не спрабуе паменшыць адток спецыялістаў з галіны, а толькі спрыяе яму, загадваючы звальняць медыкаў за нелаяльнасць да дзейнай улады?
Чаму міністэрства ігнаруе вар'яцкія ў сваіх аб'ёмах перапрацоўкі медыкаў на парушэнне ўсіх нормаў айчыннага заканадаўства?
Пра тое, чаму міністэрства фальсіфікуе статыстыку COVID-19, я нават не пытаюся. Міністэрства даўно звыклася развязваць медыцынскія праблемы “ідэйна правільнай статыстыкай”.
Я ведаю, што ў Міністэрстве аховы здароўя сочаць за публікацыямі ў “апазіцыйных каналах”, але адказу я не чакаю. Адмоўчвацца і рабіць выгляд, што нічога не адбываецца, вы ўсе ўжо прывыклі.
Вы баіцеся гневу свайго “патрона” больш за ўсё на свеце, таму і пабеглі вяшчаць пра тое, што санкцыі шкодзяць простым людзям і “давайце іх прыбірайце”. Тут вы маеце рацыю, адказваць паводле закону, напэўна, не так страшна, ды і сядзець у турме, дзе не катуюць, нашмат камфортней, чым набыць на сваю галаву злосць “шэфа”.
Часам лепш жаваць, чым гаварыць, а ў выпадку нашых палітыкаў і чыноўнікаў – не часам, а заўсёды».