У адным з менскіх дамоў з красавіка жывуць без гарачай вады, цяпла і газу

У менскім чатырохпавярховым доме ўжо некалькі месяц- капітальны рамонт.

У чатырох менскіх дамах непадалёк ад прахадной МАЗа ідзе капрамонт. Прычым у адным з чатырохпавярховых дамоў працы вядуцца з красавіка: ва ўсіх кватэрах там няма газу, а да ўчорашняга дня не было і ацяплення. У пятніцу, 24 верасня, мясцовыя жыхары распавялі Onliner, у якіх умовах жывуць, а ў ЖКГ пракаментавалі, у чым справа.

Праблемы ў доме №1

Чатырохпавярховыя дамы асаблівыя, яны знаходзяцца на вуліцы Цэнтральнай, нумары дамоў - 1, 2, 3 і 4. Дамы 1937 года пабудовы, але ў раённым ЖКГ кажуць, што капрамонт тут упершыню. Працы ў дамах на розных стадыях.

Самыя сур'ёзныя нязручнасці зараз у жыхароў дома №1, дзе рамонт цягнецца з вясны. Фасад ужо выглядае цалкам прыстойна, але ўваход у пад'езды дагэтуль па драўляных мастках - падлогі ўзнятыя.

Кватэра Святланы - на чацвёртым паверсе:

- Капрамонт у нашым доме пачаўся ў красавіку, па дамове павінен быў скончыцца ў ліпені. Але ўжо верасень, а ў нас дагэтуль няма гарачай вады, ацяплення, газу.

Жанчына жыве з дачкой, ад холаду ратуюцца з дапамогай пастаянна ўключанага абагравальніка.

- Муж пасля бальніцы з'ехаў да мамы: для акрыяння асабліва патрэбныя выгоды.

Цяжэй за ўсё, мабыць, даводзіцца жыхарам першага паверха. Напрыклад, у кватэры Соф'і Тамашэўны такая абстаноўка, што пажылая жанчына ратуецца ад разгрому на лецішчы, там пакуль і жыве.

- Калі зайшлі працоўныя ў красавіку ў кватэру, дык адразу выразалі дзірку ў падлозе. А з часам адключылі амаль усе выгоды. Падчас работ у сценах прабілі дзіркі, але дагэтуль ніхто не прыйшоў замазаць-затынкаваць, - незадаволеная жанчына.

Частка батарэй у кватэры Соф'і Тамашэўны ўжо павесілі на месца, частку - не. Пакуль у кватэры халодна.

Яшчэ адзін мясцовы жыхар Уладзімір ужо падлічвае страты.

- Я купіў гэтую кватэру два гады таму. Тады па маёй заяве прыязджалі газавікі, па праекце паставілі мне новую калонку. А цяпер капрамонт - і давялося ўсё разбурыць. Сапсавалі мне столь, здымалі дзе-нідзе плітку - відаць, усё гэта выпраўляць таксама за мой кошт.

Некаторыя жыхары дома прыкупілі газавыя гарэлкі, на іх гатуюць ежу

Што з іншымі дамамі?

Ілля з дому №3 распавядаў раніцай у пятніцу, што ацяпленне ў яго кватэры ўжо ўключылі, а вось гатаваць дагэтуль даводзіцца ў мікрахвалеўцы, нармальна карыстацца ваннай нельга. Пры гэтым мужчына баіцца, што доўгі рамонт усё ж такі не вырашыць вельмі важных праблем.

- Каля нашага дома часта прарываецца цеплатраса, пакуль не магу дамагчыся адказу, ці будуць чыніць яе, - кажа Ілля. - Падчас затапленняў у мяне ў кватэры з-пад падлогі парыла так, што з дошак вылазіла смала. Праз гэтыя аварыі за шафай з'явілася цвіль.

Дамы пад нумарамі два і чатыры на Цэнтральнай пакуль з ацяпленнем і газам, але іх жыхары ўжо напалоханыя досведам суседзяў.

- А нам усё гэта глыбокай восенню давядзецца перажыць, - незадаволеныя людзі.

Жыхары дамоў сыходзяцца ў меркаванні, што капрамонт быў патрэбны, але справа неяк занадта цяжка ідзе.

Што кажуць у ЖКГ?

Галоўны інжынер ЖКГ Заводскага раёна Аляксандр Ісакаў у пятніцу запэўніў, што ў большасці кватэр дома №1 ацяпленне падключаць у той жа дзень.

- У такіх дамах своеасаблівае размяшчэнне стаякоў: там няма падвалаў, магістралі размешчаныя проста пад падлогай на першых паверхах. Каб запусціць ацяпленне, трэба патрапіць у кожную кватэру на першым паверсе. Былі праблемы з доступам у некаторыя, але мы дамовіліся з гаспадарамі і ацяпленне сёння запусцім.

Што ж будзе з тымі, у каго ў кватэрах дагэтуль батарэі яшчэ абрэзаныя? Са слоў Ісакава, іх падключаць пасля агульнага запуску сістэмы, як толькі дамовяцца з гаспадарамі пра доступ у жыллё.

Як увогуле выйшла, што капрамонт у доме №1 так зацягнуўся? Аляксандр Ісакаў пералічыў моманты, якія тармазілі працэс. Напрыклад, доўга распрацоўваўся праект вонкавага газазабеспячэння.

- Яшчэ летась падчас капрамонту мы самі распрацоўвалі ўвесь праект: і па ўнутраным газазабеспячэнні, і па вонкавым, - кажа прадстаўнік ЖКГ. - Потым у Мінгазе наважылі, што па вонкавым газазабеспячэнні праект будуць распрацоўваць самі. Пакуль ён не з'явіўся, мы не маглі прыступіць да наступных работ.

Суразмоўца адзначае, што ў дамах праводзіцца поўная мадэрнізацыя цеплавузла з заменай цеплаабменнікаў, пасля капрамонту людзі змогуць абыходзіцца без газавых калонак, і гэта плюс.

Паводле інфармацыі Ісакава, дом №1 могуць падключыць да газазабеспячэння ўжо да канца наступнага тыдня.

- Наогул працы па дому засталося няшмат, мы разлічваем, што сыдзем з гэтага аб'екта ўжо праз дзён 10.

Спецыяліст дадае, што ў частцы кватэр давялося на хаду карэктаваць праекты праз перапланіроўкі, якія былі неўзаконеныя.

У дамах, дзе капрамонт скончыцца толькі ў кастрычніку, яшчэ будуць адключаць газ. Ацяпленне - таксама, але «гэта зойме дзень-два», прычым адключаць паспрабуюць у «спрыяльнае надвор'е».

На пытанні жыхароў вуліцы Аляксандр Ісакаў гатовы адказваць, у тым ліку падчас жывой лініі. Яна пройдзе ўжо сёння, 25 верасня, з 9:00 да 12:00. Нумар тэлефона - (8 017) 295-80-02. Ёсць у ЖКГ Заводскага раёна Менска і спецыяльная старонка на Viber (па нумары 8 044 513-91-33) для зваротаў па капрамонту.

- У Viber можна пісаць пра праблемы, прымацоўваючы фатаграфіі, каб мы неяк больш аператыўна рэагавалі.

Пастскрыптум

Бліжэй да канца дня ў пятніцу гаротны дом №1 сапраўды сталі падключаць да ацяплення, паведамілі жыхары. У частцы кватэр батарэі сталі цёплымі. Зрэшты, на Цэнтральнай учора ўвечары не абышлося без НЗ. У некалькіх кватэрах у двух дамах прарвала трубы.