Меркаванне: «Магія» пачала дзейнічаць супраць беларускіх уладаў

Пастанова Літвы можа стаць самым сур'ёзным захадам супраць рэжыму Лукашэнкі.

Telegram-канал «Лісты да дачкі» піша, што спыненне Літоўскай чыгункай транзіту беларускіх калійных угнаенняў можа моцна нашкодзіць эканамічнай будучыні.

– Там, праўда, ёсць яшчэ прыватныя кампаніі, якія могуць падхапіць эстафету, што ўпала, але, як я сабе разумею, пра гэта літоўскія ўлады таксама збіраюцца паклапаціцца, – піша аўтар канала. – Таму што яны не проста ж так спыняюць кантракт на транзіт. Яны ж абвесцілі гэты транзіт пагрозай нацыянальнай бяспецы.

Вось беларускія ўлады прызвычаіліся, што «пагроза нацыянальнай бяспецы» – аксіёма, якая не патрабуе доказаў. Магічная фраза, пасля якой можна рабіць усё, што хочацца, і нікому нічога не тлумачыць. А цяпер выявілася, што ў гэтай магіі ёсць прынцып зваротнага дзеяння.

95 адсоткаў калійнага экспарту, або амаль 2,5 мільярда даляраў у коштах 2020 года, ідзе праз Літву. А валютная выручка ад калійнага экспарту – адна з дзвюх галоўных знешніх крыніцаў папаўнення золатавалютных рэзерваў і, адпаведна, валютных інтэрвенцый для падтрымання курсу рубля. А яшчэ – крыніца выплатаў у знешніх пазыках. Так што істотнае скарачэнне гэтага экспарту можа мець вельмі непрыемныя мультыплікавальныя эфекты.

Мы з табой ужо было не раз абмяркоўвалі сумнеўнасць альтэрнатыўных брацкіх маршрутаў для беларускага калію. Прыклад з перанакіраваннем беларускіх нафтапрадуктаў у расейскія парты ў гэтым выпадку не падыходзіць. Таму што паміж наліўнымі і насыпнымі тэрміналамі ў партах ёсць непераадольная тэхналагічная розніца. Калі магутнасці порта дазваляюць заліць у танкер лішні бензін, гэта не азначае, што тыя самыя магутнасці дазваляюць засыпаць лішнія ўгнаенні.

І ніякія брацкія пачуцці не дапамогуць расейскім партам абзавесціся лішнімі тэрміналамі, каб іх хапіла яшчэ і на беларускі калій. У расейскіх партах нават для ўласных угнаенняў не хапае магутнасцяў і прыкладна трэць даводзіцца вазіць праз парты Прыбалтыйскіх краінаў.

Можна, вядома, паспрабаваць пацясніць Уралкалій, каб вызваліць месца. Але я нешта не ўпэўнены, што Уралкалій захоча добраахвотна пацясніцца дзеля свайго галоўнага канкурэнта.

Так што пастанова Літвы можа стаць самай сур'ёзнай санкцыяй з усіх, якія да гэтага часу прымалі супраць беларускіх уладаў. Тым больш, што гэтая пастанова можа мець яшчэ і ўскосныя наступствы ў выглядзе рэакцыі на яе беларускіх уладаў. І толькі ад гэтай рэакцыі залежаць аб'ёмы спадарожных стратаў. І калі беларускія ўлады пакрыўдзяцца і захочуць адказаць асіметрычна, але адэкватна, то спадарожная шкода можа стаць значна большай, чым прамая.

Хоць, як паказвае практыка ўжывання контрсанкцый, гандлёвыя войны беларускія ўлады абіраюць за лепшае весці ў асноўным з дапамогай вербальных інтэрвенцый. Бо інакш можна сабе нешта фатальна пашкодзіць у транзітнай вобласці.

Увогуле, эканамічныя азнакі проста з пачатку года здараюцца выключна неспрыяльныя. А аперацыя рэабілітацыі геапалітычнай велічы выйшла да крыўднага кароткатэрміновай.