У Магілёве ўраган сарваў дах з сабора XVIII стагоддзя

Епіскап Аляксандр Яшэўскі просіць дапамагчы аднавіць святыню.

У Магілёве ўраган сарваў дах з сабора Успення Дзевы Марыі і Святога Станіслава. Епіскап Аляксандр Яшэўскі просіць дапамагчы аднавіць гэтую святыню:

«Дарагія браты і сёстры ў Хрысце, людзі добрай волі! У гэты цяжкі момант прашу вас аб дапамозе ў аднаўленні дома Гасподняга. Прыход не можа справіцца самастойна.

Хоць мы пакуль не ведаем суму страт, мы збіраем сродкі на аднаўленне святыні, якая пацярпела ад ураганных вятроў. Дзякуй усім людзям добрай волі. Ды ўзнагародзіць Добры Бог за пасільную дапамогу».

Сабор Успення Прасвятой Багародзіцы і Святога Станіслава - помнік эпохі барока. Ён быў пабудаваны ў 1738-1752 гадах і, такім чынам, з'яўляецца адным з найстарэйшых будынкаў Беларусі.

У 1956 годзе сабор быў закрыты, у ім размясціўся Цэнтральны гістарычны архіў БССР. У 1960 годзе туды пераехаў Дзяржаўны архіў Магілёўскай вобласці. У гэты перыяд храм страціў частку роспісаў і арган з рэдкімі керамічнымі трубамі.

У пачатку 1990-х гадоў будынак сабора вернуты вернікам.