Пасля Лімана расейскія войскі разгромленыя таксама пад Бахмутам і Казацкай Лопанню

Ранішняя зводка Генштаба УСУ.

Сілы абароны Украіны пасля вызвалення ад расейскай акупацыі Лімана на Данеччыне таксама нанеслі ворагу паразу каля Казацкай Лопані, Бахмута і іншых населеных пунктаў, дзе той спрабаваў весці атакі. Захопнікі нясуць страты, але не спыняюць абстрэлаў, ракетных і авіяўдараў па вайсковай і цывільнай інфраструктуры.

На 221-ы дзень вайны ў шэрагах УС РФ прадаўжаюцца захады частковай мабілізацыі, разгрупавання падраздзяленняў і баявой падрыхтоўкі. Пра апошнія падзеі на фронце паведамляе Генеральны штаб УСУ ў ранішняй зводцы на 2 кастрычніка.

Цяпер агрэсар і далей засяроджвае намаганні на спробах акупацыі Данецкай вобласці, утрыманні захопленых тэрыторый, а таксама зрыве актыўных дзеянняў Сілаў абароны на асобных кірунках. Вораг абстрэльвае пазіцыі нашых войскаў уздоўж лініі сутыкнення, вядзе паветраную выведку.

За мінулы дзень войскі РФ нанеслі чатыры ракетныя і 16 авіяцыйных удараў, здзейснілі больш за 75 абстрэлаў з РСЗА па ваенных і цывільных аб'ектах на тэрыторыі Украіны. Акрамя таго, для ўдараў па аб'ектах інфраструктуры ўжываюць БПЛА іранскай вытворчасці Shahed-136.

За 1 кастрычніка ад варожых удараў пацярпела больш за 30 населеных пунктаў, сярод якіх Белагораўка, Бахмут, Краснагораўка, Мар'інка, Вадзяное, Трудовае, Богаяўленка, Новаўкраінка, Арэхіў, Залізнычнае, Іллінка, Нікаполь, Благадаціўка, Мікалаеў, Ачакіў і Адэса.

На Валынскім і Палескім кірунках абстаноўка без істотных зменаў. На іншых вораг прадоўжыў абстрэлы з танкаў, мінамётаў, ствольнай і рэактыўнай артылерыі, сярод іншага ў раёнах населеных пунктаў:

– на Северскім кірунку – Сярэдзіна Буда, Фотавіж і Будкі Сумскай вобласці;

– на Слабажанскім кірунку – Ваўчанск і Гацішча Харкаўскай вобласці;

– на Краматорскім кірунку – Грыгораўка, Белагораўка, Верхнякамянскае і Раздоліўка;

– на Бахмуцкім кірунку – Салядар, Бахмут, Бахмуцкае, Атрадзіўка, Вопытнае, Якаўліўка, Юр'іўка і Наваселіўка;

– на Аўдзееўскім кірунку – Аўдзееўка, Краснагораўка, Вопытнае, Первамайскае, Мар'інка, Новаміхайлаўка і Вадзяное.

На Навапаўлаўскім і Запарожскім кірунках акупанты нанеслі агнявую паразу каля Новаўкраінкі, Парасковііўкі, Прачыстаўкі, Паўліўкі, Няскучнага, Шахтарскага, Вялікай Навасілкі, Новаандрыіўкі, Залізнычнага, Гуляйполя, Гуляйпольскага, Палтаўкі, Навапіля і Врэміўкі.

На Паўднёвабужскім кірунку пад варожымі абстрэламі з танкаў, мінамётаў і ствольнай артылерыі знаходзіліся раёны 28 населеных пунктаў паблізу лініі сутыкнення.

Вораг прадаўжае несці страты на ўкраінскай зямлі дзякуючы эфектыўным дзеянням Сілаў абароны. Пацверджанае знішчэнне склада боепрыпасаў пасля агнявой паразы 30 верасня ў раёне Чарнігаўкі Запарожскай вобласці і раненне блізу 50 акупантаў.

Прадаўжаюцца захады частковай мабілізацыі, абвешчанай ваенна-палітычным кіраўніцтвам РФ. З 30 верасня ваенныя часткі агрэсара, якія базуюцца на часова акупаванай тэрыторыі Крыма, прыведзеныя ў баявую гатоўнасць «поўная», праводзяцца мерапрыемствы для разгрупавання падраздзяленняў. Вядома пра фармаванне на тэрыторыі паўвострава мотастралковай дывізіі за кошт мабілізаваных мужчынаў з Крыма, а таксама Краснадарскага краю і рэспублікі Адыгея.

Заўважанае прыбыццё ў пункт сталай дыслакацыі 810-й асобнай брыгады марской пяхоты, якая базуецца ў горадзе Севастопалі, блізу 2000 навабранцаў.

У Будзёнаўску Стаўрапольскага краю РФ у 205-ю асобную мотастралковую брыгаду 49-й агульнавайсковай арміі Паўднёвай ваеннай акругі праз мабілізацыі прыбыло да 5000 чалавек. Вядома, што ў пункце сталай дыслакацыі часткі размешчана блізу 3000, астатнія – у намётавым мястэчку на палігоне Нікала-Аляксандраўскі. З мабілізаванымі пачаліся заняткі ў баявой падрыхтоўцы.

Разам з тым падраздзяленні УСУ за 1 кастрычніка адбілі варожыя атакі ў раёнах населеных пунктаў Казачая Лопань, Выімка, Бахмуцкае, Бахмут, Вясёлая Даліна і Первамайскае.

Для падтрымкі дзеянняў наземных груповак авіяцыя Сілаў абароны за мінулы дзень нанесла 29 удараў. Пацверджаная параза апорнага пункта акупантаў, 22 месцаў засяроджвання ўзбраення і ваеннай тэхнікі, а таксама шасці зенітных ракетных комплексаў. Акрамя таго, нашы падраздзяленні СПА збілі два расейскія БПЛА.

Ракетныя войскі і артылерыя за дзень падбілі восем камандных пунктаў, 10 раёнаў засяроджвання жывой сілы, узбраення і ваеннай тэхнікі УС РФ. Акрамя таго, у зону паразы трапілі тры склады з боепрыпасамі і два зенітныя ракетныя комплексы С-300 захопнікаў.