У Беларусі будуць па-новаму разлічваць адпачынкавыя грошы
5- 16.11.2022, 20:33
- 31,684
Ужо з 1 студзеня 2023 года.
У Беларусі з 1 студзеня 2023 года будуць па-новаму разлічваць адпачынкавыя грошы. З чым гэта звязана, расказалі ў Міністэрстве працы і сацыяльнай абароны.
Так, Мінпрацы ўнесла змяненні ў інструкцыю аб парадку вылічэння сярэдняга заробку, які захоўваецца працаўніку на час адпачынку, а таксама з'яўляецца арыенцірам для выплаты грашовай кампенсацыі за нявыкарыстаны працоўны адпачынак. Сярэднямесячная колькасць каляндарных дзён зменшаная з 29,7 да 29,6.
У Мінпрацы растлумачылі, што гэта звязана з дзяржаўнымі святамі ў Беларусі – раней іх было 9, а цяпер – 10. Такім чынам, пры разліку адпачынкавых грошай сярэдні заробак, у які ўваходзяць таксама прэміі, бонусы, надбаўкі і ўзнагароды, будзе дзяліцца на меншую колькасць каляндарных дзён, а значыць, будзе крыху вышэйшы, як і кампенсацыі за адпачынак.
Ва ўстанове таксама звярнулі ўвагу на тое, што выплаты, якія праводзяцца за актуальны месяц, як і раней, уключаюцца ў разлік сярэдняга заробку ў тым месяцы, за які яны налічаныя.
– Штомесячная прэмія за кастрычнік і налічаная ў кастрычніку ўключыцца ў разлік сярэдняга заробку ў кастрычніку, – растлумачылі ў Мінпрацы.
Паведамляецца, што новы парадак вылічэння сярэдняга заробку набывае моц 1 студзеня 2023 года.