Чыноўнікі надумалі сабатаваць яшчэ адзін загад Лукашэнкі

Замест уласнай вытворчасці Tetra Pak шукаюць кітайскую «альтэрнатыву».

Менск вядзе перагаворы з кітайскай кампаніяй у пошуках альтэрнатывы пакавання для малака доўгага тэрміну захоўвання. Пра гэта паведаміла прэс-служба Мінсельгасхарча.

У Мінсельгасхарчы прайшлі перамовы з прадстаўнікамі кітайскай кампаніі Lutta-pak у пытанні пастаўкі пакавання на беларускія арганізацыі малочнай прадукцыі.

«Бакі ў пазітыўным ключы ацанілі планы кампаніі ў арганізацыі продажаў і планаванні вытворчасці асептычнага пакавання», – паведаміла прэс-служба ўстановы.

У міністэрстве не ўдакладняюць, ці дасягнутая канчатковая дамоўленасць. Але вядома, што ў найбліжэйшы час кітайскія партнёры праедуцца па малочных заводах «для ўдакладнення якасных і тэхнічных характарыстык».

Нядаўна пра тое, што замест Tetra Pak у Беларусі хочуць выкарыстоўваць яго кітайскія і індыйскія аналагі, паведамляў намеснік міністра сельскай гаспадаркі і харчавання Вадзім Шагойка. Мяркуючы з усяго, наладзіць сваю вытворчасць упакоўкі або перабудаваць вытворчасці ў Беларусі не атрымалася, нягледзячы на патрабаванні Аляксандра Лукашэнкі зрабіць гэта да канца года.

Нагадаем, у ліпені беларусы рэгулярна паведамлялі пра бедны выбар у крамах, а часам і дэфіцыт малака і вяршкоў. У гандлі гэта тлумачылі перабоямі ў пастаўках ад вытворцаў, а апошнія – з праблемамі з сыравінай і пакаваннем.

У пачатку жніўня на пасяджэнні Рады міністраў аб функцыянаванні эканомікі ва ўмовах санкцый і захадах у іх пераадоленні, кіраўнік Мінсельгасхарча Ігар Брыло прызнаў, што ёсць пэўная праблема з пакаваннем Tetra Pak і пакуль не атрымаецца замясціць яго ў поўным аб'ёме.

Да гэтага Раман Галоўчанка папярэджваў пра цяжкасці вытворчасці такой упакоўкі: «Пакуль гэтая тэхналогія, якую ў свеце ніхто не змог паўтарыць, хоць здаецца, нібыта вельмі проста». Тым не менш у канцы кастрычніка кіраўнік Мінсельгасхарча Ігар Брыло заяўляў, што цяпер ніякіх пытанняў з пакаваннем Tetra Pak у беларускіх прадпрыемстваў няма.