Bloomberg: Расея надумала сама сябе пакараць з нафтай

Крэмль рыхтуе дзіўны ўказ.

На дзясятым месяцы поўнамаштабнага расейскага ўварвання ва Украіну Крэмль рыхтуе прэзідэнцкі ўказ, які забароніць расейскім кампаніям і любым трэйдарам, якія набываюць нацыянальную нафту, прадаваць яе каму-небудзь, хто ўдзельнічае ў коштавай столі.

Як паведамляе Bloomberg, указ забароніць весці справы як з кампаніямі, так і з краінамі, якія далучыліся да механізму абмежавання коштаў. Як паведамляе выданне, гэта забароніць любое згадванне памежнага кошту ў кантрактах на расейскую нафту або нафтапрадукты, а таксама забароніць пагрузку, прызначаную для любых краінаў, якія прымаюць абмежаванні.

Як гаворыцца ў матэрыяле, незразумела, які ўплыў на гандаль зробіць абмежаванне коштаў ці ўказ Крамля ў адказ.

Гэта звязана з тым, што фармальныя прыхільнікі гэтага захаду ўжо ўстрымліваюцца ад набыцця расейскай нафты. Гэтая палітыка на самай справе нацэленая на іншых буйных спажыўцоў, як Індыя, у якіх не будзе доступу да заходняга страхавання і іншых службаў дастаўкі, калі яны будуць плаціць за расейскую нафту больш за вызначаны кошт.

Прэзідэнт краіны-агрэсаркі Уладзімір Пуцін ужо неаднаразова заяўляў, што Расея не будзе пастаўляць энэргію тым, хто далучыцца да коштавай столі. Расея пагражае перанакіраваць свае пастаўкі нафты «рынкава-арыентаваным партнёрам» або скараціць здабычу, заявіў раней на гэтым тыдні віцэ-прэм'ер Аляксандр Новак.