Святара Уладзіслава Багамольнікава арыштавалі сёмы раз запар

Палітвязень знаходзіцца на Акрэсціна ў Менску.

Святар Уладзіслаў Багамольнікаў быў затрыманы 31 жніўня і з таго часу знаходзіцца на Акрэсціна, адбыўшы 6 адміністрацыйных тэрмінаў запар. Чакалася, што ён мусіў выйсці сёння пасля адбыцця шостага тэрміну, але так і не выйшаў. Мяркуючы па ўсім, на яго быў складзены новы пратакол і ён зараз у статусе затрыманага чакае новага суда, паведамляе тэлеграм-канал «Хрысціянская візія».

Умовы ўтрымання вельмі жорсткія - не прымаюць ніякія перадачы, у тым ліку лекі і вітаміны. У святара Уладзіслава моцны кашаль, які не праходзіць з яго першага арышту, калі ён хварэў на каранавірусы.

Святар стаў ужо легендай Акрэсціна - сукупная працягласць яго арыштаў адна з самых вялікіх. Айцец Уладзіслаў чытае лекцыі па філасофіі для сваіх сукамернікаў - менавіта гэты прадмет ён выкладае і ў Менскай духоўнай акадэміі. Таксама ён духоўна падтрымлівае іншых зняволеных, у асяроддзі якіх карыстаецца вялікай павагай.