Беларуса папрасілі выплаціць крэдыт, які ён не браў

Дзіўная гісторыя адбылася ў Гомелі.

Гэтая гісторыя пачалася яшчэ ў 2017 годзе, але скончылася не так даўно. Знаёмец папрасіў гомельца ўзяць за яго крэдыт, паабяцаўшы, што выплачваць будзе сам, піша «Анлайнер».

Мужчына ад гэтай сумнеўнай прапановы адмовіўся, але праз нейкі час з ім звязаліся прадстаўнікі "Белінвестбанка" і паведамілі, што ён мае запазычанасць у выплатах. Высветлілася, што ён вінен арганізацыі 10 тысяч рублёў. Беларус заявіў, што ніякіх грошай не браў і дайшоў да суда.

Дакументы з банка накіравалі ў міліцыю. Там правялі графалагічную экспертызу і высветлілі, што подпіс у кантракце чужы. У судзе пацярпелы беларус папрасіў прызнаць умову нікчэмнай. "Белінвестбанк" з гэтым згодны не быў, але скончылася ўсё не на карысць арганізацыі.

У судзе гомелец здолеў давесці, што ніякіх грошай не атрымліваў, дазволу распісвацца за сябе нікому не даваў - мяркуючы з усяго, за яго гэта зрабіў той самы знаёмец.

У выніку суд стаў на бок пазоўніка. Крэдытнае пагадненне прызналі нікчэмным, а судовыя выдаткі падзялілі пароўну паміж банкам і тым самым ягамосцем (на суд ён не з'явіўся). Прысуд ужо ўступіў у законнае дзеянне - абскарджваць яго адказчыкі не сталі.