Наталля Радзіна: Здаецца, у апошнія тыдні Лукашэнка разыгрывае спектакль

Украіне нельга забываць, што дыктатар — марыянетка Расіі.

Беларусь апынулася ў цэнтры ўвагі з-за цэлага шэрагу гучных падзей. 19 чэрвеня прэзідэнт Украіны Уладзімір Зяленскі паставіў Лукашэнку ўльтыматум, заявіўшы, што дыктатар павінен цягам тыдня дэмантаваць расійскія рэтранслятары, якія накіроўваюць дроны. 24 чэрвеня Зяленскі сказаў, што беларускі кіраўнік выканаў яго патрабаванні. 26 чэрвеня Лукашэнка з'явіўся на Валдаі, дзе сустрэўся з Пуціным. Дыктатары не зрабілі заяваў пасля сустрэчы, што нарадзіла шэраг чутак пра тое, што Крэмль цісне на Лукашэнку з мэтай паўторнага нападу з тэрыторыі Беларусі на Украіну. 29 чэрвеня беларускі кіраўнік прыляцеў у Кітай, дзе сустрэўся са старшынём КНР Сі Цзіньпінам. Пасля сустрэчы ў Пекіне шэраг экспертаў заявіў, быццам «Лукашэнка сарваў планы Пуціна» і «адарваўся ад Расіі, заручыўшыся падтрымкай Кітая».

Галоўная рэдактарка сайта Charter97.org Наталля Радзіна у інтэрв'ю YouTube-каналу украінскага інфармацыйнага агенцтва «УНІАН» выказала меркаванне, што многія апошнія заявы і дзеянні Лукашэнкі — пастановачныя:

— Я з цікавасцю паглядзела ваш сюжэт, і ў мяне ўзнікла адчуванне, што мы проста ўдзельнічаем у нейкім грандыёзным спектаклі. Здаецца, ідзе актыўная інфармацыйна-псіхалагічная аперацыя, быццам «Лукашэнка спрабуе сысці ад ціску з боку Пуціна», як яму «ўдаецца гэта паспяхова рабіць», што «рыхтуецца напад на Украіну», хоць усе эксперты ў адзін голас заяўляюць, што на тэрыторыі Беларусі не размешчана дастатковая колькасць расійскіх войскаў і мы не бачым ніякай падрыхтоўкі да наступальных дзеянняў.

Паявіліся заявы, што Лукашэнка «пайшоў супраць Расіі і адключыў рэтранслятары». Галоўнакамандуючы ЗСУ Аляксандр Сырскі сказаў, што тыя ж рэтранслятары 29 чэрвеня былі зноў уключаныя. Значыць, Лукашэнка іх канчаткова не адключыў. Мы нават не ведаем, пра што размаўляў Лукашэнка з Пуціным на Валдаі, бо не тое што заяў, нават фатаграфій і відэа не было з гэтай сустрэчы.

Што да заяў Кітая аб падтрымцы суверэнітэту, ён заўсёды пра гэта кажа, бо Пекіну надзвычай важны сухапутны калідор для сваіх тавараў праз тэрыторыю Беларусі. Былі сотні заяў з боку Кітая адносна таго, што Беларусь павінна быць суверэннай незалежнай дзяржавай.

У мяне ёсць адчуванне, што чарговы раз ляпяць вобраз Лукашэнкі, які зноў сышоў ад Пуціна. «Які ён выдатны, які ён хітры». І вось цяпер быццам ужо можна пакладацца на Лукашэнку, здымаць з яго санкцыі і неяк выбудоўваць з ім адносіны нават ва Украіне. І тут я проста хачу вас папярэдзіць, бо Лукашэнку нельга ні ў якім разе давяраць.

Так, ён круціцца, як вугор на патэльні, але ён цалкам залежны ад Расіі. У яго няма магчымасці для манеўру, нават нягледзячы на цяперашнія спробы перамоваў з ЗША. Паверце, Пуціна ён баіцца значна больш, чым Трампа, які можа прайграць найбліжэйшыя прамежкавыя выбары ў Кангрэс.

Усё, што трэба Лукашэнку, — каб з яго здымалі санкцыі, бо ягоная эканоміка ідзе на дно.

Інфармацыя пра ціск на Лукашэнку з боку Пуціна, на думку галоўнай рэдактаркі сайта Charter97.org, — частка спектакля беларускага кіраўніка:

— Пра гэта мы даведаліся ў асноўным з заходняй прэсы. Нібыта ідзе актыўны ціск Крамля, каб выкарыстаць Беларусь у вайне. Але ён і так яе выкарыстоўвае ў гэтай вайне.

Ці патрэбнае яму паўторнае наступленне з тэрыторыі Беларусі на Украіну? Па-першае, у Пуціна сёння няма асабовага складу. Мы бачым, што проста бракуе салдат у расійскай арміі, каб ваяваць на Данбасе. Яму патрэбныя яшчэ як мінімум 100 тысяч вайскоўцаў, якіх ён размесціць у Беларусі для атакі на Украіну. Мабілізацыя на дадзены момант у Расіі не абвешчана.

Па-другое, той жа галоўнакамандуючы ЗСУ Сырскі ў сваім інтэрв'ю заявіў, што паўторнае наступленне з тэрыторыі Беларусі малаверагоднае, бо на мяжы балотная глеба, падарваныя ўсе масты, вельмі мала дарог. Цяжкая тэхніка проста завязне, калі паспрабуе перасекчы мяжу з Украінай. Калі будзе наступ, напрыклад, на Чарнігаўскую вобласць, то, найхутчэй, ён будзе з Бранскай вобласці Расіі.

Вядома, Пуцін вар'ят, ён хоча эскалаваць сітуацыю. Але як ён у гэты момант можа выкарыстаць Беларусь пры недахопе рэсурсаў, я пакуль не разумею. Пагроза заўсёды будзе і яна застаецца, пакуль у Беларусі кіруе пуцінская марыянетка Лукашэнка. Але цяпер у мяне ўсё роўна ствараецца ўражанне, што гэта проста арганізаваны Лукашэнкам спектакль.

Наталля Радзіна лічыць, што беларускі кіраўнік, які дамагаецца зняцця санкцый, можа задзейнічаць супраць Захаду шантаж і ціск, а потым, стварыўшы ілюзію суб'ектнасці, паспрабаваць дамагчыся перамоваў:

— Спачатку трэба напалохаць заходнікаў, што з тэрыторыі Беларусі можа быць захопленая Літва або Латвія, можа быць напад на Польшчу. Мы бачым гібрыдныя атакі, якім падвяргаюцца суседнія краіны НАТА, паветраныя шары з кантрабандай, што ляцяць у Літву, атакі мігрантамі межаў, атакі дронамі. Усё гэта мы назіраем, і гэтыя інцыдэнты, я ўпэўненая, будуць паўтарацца. Безумоўна, каб пазбегнуць гэтых пагроз, напалоханая Еўропа можа згадзіцца, што варта перайсці да нейкай размовы з беларускім дыктатарам. Тым больш, ён жа «ідзе супраць Пуціна», «мужна трымаецца», а цяпер паехаў у Кітай, каб дамаўляцца з Сі Цзіньпінам.

Наталля Радзіна звяртае ўвагу на цікавую дэталь, звязаную з візітам Лукашэнкі ў Пекін:

— Ён паехаў у Кітай, каб прысутнічаць на ўручэнні дыплома ў Пекінскім універсітэце для яго малодшага сына Колі. Вось і ўсё. Ён сумясціў паездку прыватнага характару па сямейных абставінах і сустрэўся з Сі Цзіньпінам. Вы разумееце, што гэта ўжо не візіт тэрміновага характару, калі «ой-ой-ой, ратуйце, я бягу да вас, кітайцы, дапамажыце, так мяне ціснуць». Вось таму я і кажу пра шоу.

Наталля Радзіна адзначае, што сёння ператварэнне Беларусі ў арэну баявых дзеянняў нявыгадна ўсім бакам:

— Вядома, Лукашэнка жахліва баіцца нанясення нейкіх удараў з боку Украіны і па тых самых рэтранслятарах, а таксама па іншых аб'ектах. За апошні месяц мы чулі заявы экспертаў з Украіны, якія наўпрост казалі, што ЗСУ могуць выключыць беларускую эканоміку літаральна за адзін дзень. Дастаткова ўдараў па «Беларуськаліі», па НПЗ у Наваполацку і Мазыры — і сітуацыя імгненна дэстабілізуецца.

Іншая справа, што нельга выключаць, што ў гэтай сітуацыі Расія сапраўды цалкам уцягне Беларусь у вайну: будзе праведзеная тэрміновая мабілізацыя ў РФ, маўляў, трэба ж «ратаваць сваіх беларускіх братоў», і тады ўжо Беларусь стане арэнай для ваенных дзеянняў. Як мне падаецца, гэта аднолькава нявыгадна як для Лукашэнкі, так і для самой Украіны.

Я разумею, што робіць Украіна, калі заяўляе, што можа наносіць удары, я сама заклікала Кіеў папярэджваць дыктатара. Лукашэнку трэба палохаць, ён павінен разумець, што такая пагроза існуе, і Пуцін павінен усведамляць, што гэта можа адбыцца.

Аднак Пуціну выгадней, каб Беларусь заставалася плацдармам, з якога можна запалохваць як саму Украіну, так і краіны Еўропы, а калі ты перастаеш запалохваць і пераходзіш ужо да канкрэтных дзеянняў, у гэтай сітуацыі ты проста можаш «атрымаць па шчаках». Мы выдатна ведаем, што калі Расія, напрыклад, паспрабуе насамрэч напасці на краіну НАТА, то адказ паследуе неадкладна, і Крэмль прайграе гэтую вайну.

Галоўная рэдактарка сайта Charter97.org звяртае ўвагу на тое, што Пуціну выгодна выкарыстоўваць Беларусь для абыходу заходніх санкцый:

— Ён выдатна разумее, што санкцыі супраць Беларусі слабейшыя, чым у дачыненні да Расіі. У тым ліку амерыканцы пачалі працэс зняцця некаторых эканамічных абмежаванняў з беларускага рэжыму ў абмен на вызваленне некаторых, не ўсіх палітычных зняволеных.

Гэта дазваляе Расіі праз тэрыторыю Беларусі атрымліваць падсанкцыйныя тавары. Я думаю, што Беларусь тут па-ранейшаму выкарыстоўваецца, як і выкарыстоўвалася з 2014 года, у якасці кантрабанднага хаба, праз які ўсе гандлявалі. Таму крайне нявыгадна ператвараць Беларусь у тэрыторыю ваенных дзеянняў.

У канцы інтэрв'ю Наталля Радзіна адказала на пытанне пра сітуацыю і настроі ў Беларусі:

— Абсалютная большасць беларусаў супраць гэтай вайны. Што да сітуацыі, дык я літаральна сёння чытала, што ў Радзе па правах чалавека ААН быў прадстаўлены даклад спецдакладчыка па Беларусі, і ён заявіў, што наша краіна — першая ў свеце паводле колькасці палітычных зняволеных на душу насельніцтва.

Можаце сабе ўявіць узровень рэпрэсій, якія сёння адбываюцца ў Беларусі. У гэтай сітуацыі, вядома, людзі не могуць адкрыта выказвацца супраць вайны, выходзіць на антываенныя дэманстрацыі. Але, безумоўна, удзельнічаць у гэтай вайне, ваяваць, тым больш супраць украінцаў, у Беларусі не хочуць. Лукашэнка і Пуцін таксама разумеюць, што беларускае войска, якое не мае баявога досведу, абсалютна не хацела б ваяваць супраць Украіны.

2020 год паказаў, што беларусы не надта схільныя да ўздзеяння прапаганды, як беларускай, так і расійскай. Пратэсты, якія прайшлі па ўсёй краіне, калі супраць Лукашэнкі на вуліцы выйшла парадку мільёна чалавек, паказалі, што прапаганда не працуе.

Сайт «Хартыя’97», галоўнай рэдактаркай якога я з'яўляюся, вельмі шмат піша пра Украіну, мы стараемся даносіць да сваіх чытачоў як мага больш інфармацыі пра тое, што адбываецца ў вашай краіне. Мы з'яўляемся самым папулярным незалежным сайтам і, нягледзячы на блакіроўку, нас чытае вельмі вялікая колькасць людзей у Беларусі. Мы бачым па статыстыцы, што тэма Украіны надзвычай важная, што беларусы гэта чытаюць, гэтым цікавяцца, тым, што адбываецца ў вашай краіне. Мы ведаем, што ў тым ліку змаглі распрапагандаваць і беларускую армію. Беларусы заўсёды былі больш еўрапейскімі, яны ментальна адрозніваюцца ад расіян. І тут, вядома, нават расійскае тэлебачанне не змагло сапсаваць беларуса.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com