Украіна атрымае ад Брытаніі ракеты, якія дазволяць супрацьстаяць РФ на моры

Пра гэта заявіў пасол Украіны ў Вялікабрытаніі.

Украіна атрымае ад Вялікабрытаніі ракетнае ўзбраенне для караблёў. Яно дазволіць супрацьстаяць Расеі ў Чорным і Азоўскім морах.

Пра гэта паведамляе РБК-Украина са спасылкай на інтэрв'ю амбасадара Украіны ў Вялікабрытаніі Вадзіма Прыстайкі радыё НВ.

«Брытанія шукае сяброў, і Украіна на гэтую ролю ў прынцыпе падыходзіць. Нягледзячы на багаж праблем, якія цягне сяброўства з нашай дзяржавай, а гэта перш за ўсё супрацьстаянне з РФ, Брытанія гатова да такога кроку», - сказаў Прыстайка.

З ягоных слоў, дэманстрацыяй падтрымкі Украіны з боку Брытаніі з'яўляюцца пастаўкі ўзбраення. Амбасадар зазначыў, што ўжо падпісанае вайсковае пагадненне на 2 млрд даляраў.

Прыстайка ўдакладніў, што пагадненні прадугледжваюць рэалізацыю чатырох канкрэтных праектаў. Адзін з іх - пабудова ў Шатландыі двух караблёў, якія пераабсталююцца пад патрэбы ўкраінскіх вайскоўцаў. Акрамя таго, гэта пабудова караблёў спачатку на брытанскіх, а потым на ўкраінскіх верфях.

«І гэтае ракетнае ўзбраенне. Упершыню нашы Узброеныя сілы атрымаюць рэальную зброю, ракеты, якія нам дазволяць што-небудзь супрацьпаставіць Расеі ў Чорным і Азоўскім морах», - дадаў дыпламат.