У цэнтры Ерэвана прыхільнікі апазіцыі блакавалі будынак мэрыі

Прыхільнікі апазіцыі ў Ерэване выйшлі на новую акцыю грамадзянскага непадпарадкавання.

У цэнтры Ерэвана некалькі сотняў удзельнікаў акцыі грамадзянскага непадпарадкавання ў сераду, 11 траўня, акружылі ерэванскую мэрыю і паспрабавалі ўварвацца ў будынак, іх дзеянням перашкаджалі супрацоўнікі праваахоўных органаў, паведамляе «Интерфакс». Адзін з лідараў апазіцыі, дэпутат ад партыі «Дашнакцуцюн» і віцэ-спікер парламента Ішхан Сагатэлян заклікаў сваіх прыхільнікаў заблакаваць усе ўваходы і выхады ў будынак мэрыі. Пасля гэтага туды былі сцягнуты дадатковыя сілы паліцыі, паведамляе DW.

Сагатэлян адмовіўся адвесці дэманстрантаў ад будынка мэрыі, але праз дзве гадзіны заклікаў іх разблакаваць будынак, заявіўшы, што «мэта выкананая». «Заклікаю разблакаваць будынак і працягнуць наша пераможнае шэсце. У заўтрашняй Арменіі не будзе «чорных» і «белых», «сваіх» і «чужых», «ранейшых» і «цяперашніх», мы павінны жыць у яднанні», - цытуе яго словы «Интерфакс».

Між тым выданне News.am піша, што прыхільнікі апазіцыі неаднаразова заяўлялі, што не збіраюцца заходзіць у мэрыю, іх мэтай з'яўляецца толькі парушэнне працы ўстановы, якая кантралюецца, з іх слоў, прэм'ер-міністрам Ніколам Пашынянам. «Ніякага гвалту народ не прымяняе. Гэта прынцыповае пытанне. Наша адзінства прынясе яднанне каб супрацьстаяць пагрозам. Калі будуць правакацыі, вінаватыя адкажуць», - заявіў дэпутат ад блока «Арменія» Арцвік Мінасян. Акцыі ля будынка мэрыі Ерэвана папярэднічала дэманстрацыя, у якой удзельнічалі некалькі тысяч чалавек. Пасля таго як будынак мэрыі быў разблакаваны, актывісты працягнулі шэсце ў цэнтры Ерэвана, піша News.am.

Новая хваля антыўрадавых пратэстаў у Ерэване

Антыўрадавыя пратэсты, арганізаваныя парламенцкай апазіцыяй і шэрагам апазіцыйных груп, працягваюцца ў Ерэване з 17 красавіка. Яны пачаліся пасля прамовы прэм'ер-міністра Пашыняна ў парламенце, дзе ён выступіў з ініцыятывай «апусціць планку ў пытанні статусу Карабаха» і заклікаў падпісаць мірнае пагадненне з Азербайджанам.

30 красавіка экс-кіраўнік Службы нацыянальнай бяспекі (СНБ) Артур Ванецян, які раней затрымліваўся праз падазрэнне ў замаху на Пашыняна і ўзурпацыі ўлады, заявіў пра аб'яднанні ўсіх апазіцыйных сіл вакол патрабавання аб адстаўцы кіраўніка ўрада. З ягоных слоў, у выпадку прыходу апазіцыі да ўлады будуць прынятыя захады ў спыненні «аднабаковых уступак» Азербайджану, паглыбленыя дачыненні з Расеяй.