3 лiпеня 2022, Нядзеля, 21:46
Сім сім, Хартыя 97!
Рубрыкі

У Лукашэнкі збанкрутаваў найбуйнейшы ў Еўропе завод у вытворчасці алмазаў

32
У Лукашэнкі збанкрутаваў найбуйнейшы ў Еўропе завод у вытворчасці алмазаў

Прадпрыемства прадаюць «з малатка».

На аўкцыён ІПМ-таргі выставілі, здавалася б, пасрэдны лот: нерухомасць ТАА «АдамасІнвест» у аграгарадку Атоліне. Ён і быў бы пасрэдным, калі б не адна акалічнасць: гэта найбуйнейшы ў Еўропе завод штучных алмазаў. І належаў ён Кіраўніцтву спраў Лукашэнкі. Але збанкрутаваў, піша the-village.me.

На таргі выстаўленыя адразу тры лоты.

Першы - гэта ўласна нерухомасць з абсталяваннем, так званае «ізаляванае памяшканне №1». Трохпавярховы будынак агульнай плошчай 7888 квадратных метраў.

Пачатковы кошт лота – 2 202 200 рублёў (893 488 даляраў), прычым гэта ўжо зніжаны на 50% кошт: у студзені завод ужо спрабавалі прадаць за 4,4 мільёна рублёў. Крок аўкцыёну ўстаноўлены на 110 110 рублёў. Але калі раптам ахвотных не знойдзецца, то лот гатовы саступіць мінімальным коштам 1 101 100 рублёў (446 784 даляры). Таксама пакупнік павінен будзе аплаціць узнагароду арганізатару таргоў (2% ад выніковай сумы) і 400 рублёў выдаткаў.

Яшчэ два лоты - гэта «ізаляванае памяшканне №8» (за 39 400 рублёў) і «ізаляванае памяшканне №9» (за 147 500 рублёў). Такім чынам, агульная пачатковая сума трох лотаў складае 2 389 100 рублёў, ці 969 405 даляраў.

Асобным лотам праходзіць «Станок адразны МПС-1477» выпуску 1996 года: за яго хочуць атрымаць 8 450 рублёў.

Таргі адбудуцца 7 чэрвеня.

Кампанія ўваходзіла ў сістэму Кіраўніцтва спраў прэзідэнта. «АдамасІнвест» пазіцыянавала сябе як найбуйнейшага вытворцу сінтэтычных алмазаў у Еўропе. У 2018 годзе ў Нацыянальным мастацкім музеі ў Менску паказалі першую калекцыю ўпрыгожванняў ад «АдамасІнвест». Ставілася мэта - выйсці на рынкі ЕЗ і ЗША.

У мінулым верасні суд прызнаў «АдамасІнвест» банкрутам, і пачалася ліквідацыя. Паводле звестак на красавік 2021 года, запазычанасці кампаніі перавышалі 5 мільёнаў рублёў, і фактычна не было абаротных сродкаў, піша OfficeLife.

Юрыдычная асоба была зарэгістраваная яшчэ ў 2013 годзе. У 2020-м уласнік ужо наважыў яе ліквідаваць. Раней гэтай жа вытворчасцю займалася дзяржкампанія РУП «Адамас БДУ». Яе ліквідацыю пачалі ў 2015 годзе і скончылі працэс у 2019 годзе. Для выплаты пазык быў прададзены офіс на вуліцы Грушаўскай у Менску.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».