Пуцін учыніў вялікую стратэгічную памылку
5- 26.05.2022, 12:57
- 7,520
Столтэнберг назваў галоўныя задачы NATO ў вайне Расеі супраць Украіны.
Генеральны сакратар NATO Енс Столтэнберг заявіў, што Альянс зараз павінен не дапусціць эскалацыі вайны, а таксама працягваць аказваць падтрымку Украіне.
Пра гэта паведамляе Rzeczpospolita.
«Першая задача NATO - аказваць падтрымку і ў доўгатэрміновай перспектыве. Таму я звяртаюся да хаўруснікаў з просьбай папоўніць запасы. Таму што гэта ўсё больш і больш вайна на знясіленне», - сказаў ён.
З ягоных слоў, другая задача - не дапусціць эскалацыі.
«Наша асноўная адказнасць - абараніць усіх нашых хаўруснікаў, мільярд людзей, якія жывуць у краінах NATO. Вайна ва Украіне жудасная, жорсткая. Мы бачым ахвяры сярод мірнага насельніцтва, бамбардзіроўкі, разруху, разбурэнні гарадоў. Але калі гэта перарасце ў поўнамаштабную вайну паміж NATO і Расеяй, гэта прынясе значна большую шкоду», - сказаў ён.
З ягоных слоў, Пуцін учыніў вялікую стратэгічную памылку.
"Ён планаваў дасягнуць пастаўленых мэт на працягу тыдня. Цяпер 13-ты тыдзень вайны, і расейскія войскі выцесненыя з Кіева, Харкава і поўначы краіны», — сказаў ён.
Аднак Столтэнберг дадаў, што войны непрадказальныя.
"І ніхто не можа з упэўненасцю сказаць, калі і чым скончыцца гэтая вайна. Тое, што мы ўбачылі, гэта, вядома, мужнасць і прафесіяналізм украінскіх воінаў, палітычнага кіраўніцтва на чале з прэзідэнтам Зяленскім і простых украінцаў. Гэта ў спалучэнні з беспрэцэдэнтнай вайсковай падтрымкай хаўруснікаў і партнёраў па NATO дазволіла супрацьстаяць расейскаму ўварванню», - сказаў ён.