Як адрозніваюцца мінімальныя заробкі ў Беларусі і суседніх краінах

У чатыры разы саступаем літоўцам.

Цэнтрабанк Літвы прапануе павысіць мінімальны заробак. Нядаўна яго суму павялічылі і ў Беларусі. «Зеркало» параўнала, як выглядае наша краіна па ўзроўні мінімальнага заробку на фоне суседзяў.

Мінімальны заробак - гэта самая нізкая дапушчальная законам сума аплаты працы наёмнага работніка, які працуе на стаўку і выконвае свае абавязкі цалкам.

У Беларусі мінімальны заробак складае 480,96 рублёў. Гэта 189,99 даляраў ці 180,79 еўра курсам Нацбанку на 27 чэрвеня. Гэта заробак да выплаты падаткаў, пасля выліку падаходнага падатку і страхавых унёскаў у ФСАН на рукі чалавек атрымлівае 413,63 рубля. Нагадаем, у Беларусі «мінімалку» праіндэксавалі ў красавіку праз рост інфляцыі.

Ва Украіне з пачатку года гэты паказчык складае 6500 грыўняў або 557 рублёў. Але калі пераводзіць заробак у даляры паводле курсу цэнтрабанка гэтай краіны, то ён атрымліваецца 222 даляры або 611 рублёў. З кастрычніка яго плануюць павысіць да 6700 грыўняў (574,49 рубля паводле курсу Нацбанку Беларусі).

У Расеі мінімальны ўзровень аплаты працы вырас з 1 чэрвеня да 15 279 мясцовых рублёў (722 беларускія рублі).

У Літве самы маленькі дапушчальны заробак пры поўнай нагрузцы 730 еўраў (1942 рублі). Але там лічаць гэты ўзровень недастатковым і жадаюць павялічыць да 867 еўраў (2306 рублёў). У Латвіі мінімальны даход наёмнага работніка ніжэйшы — 500 еўраў (1330 рублёў). Гэта другі пасля Баўгарыі самы нізкі паказчык у краінах Еўразвяза.

У Польшчы гэты паказчык складае 3010 злотых (1707 рублёў).

У той жа час паказальны адрыў мінімальнага заробку ад сярэдняга. У Беларусі яны адрозніваюцца ўтрая. Большы гэты разрыў толькі ў Расеі - у 4,3 разы. У Літве і Польшчы розніца складае 2,1 разы, у Латвіі - 2,4 разы, ва Украіне - 2,2 разы.

Відавочна, пры параўнанні заробку ў адрыве ад коштаў і структуры выдаткаў складаецца не поўная карціна сітуацыі яе атрымальнікаў у гэтых краінах. Але ўзровень мінімальнай забяспечанасці пры поўнай загрузцы наёмнага работніка дае некаторае ўяўленне аб іх жыцці ў краіне.