Эксперт: Лукашэнка будзе выкарыстоўваць беларускіх вайскоўцаў, як данбаскіх «мобікаў»

Рэжыму не выстачыць сілаў для паўнавартаснай вайны супраць Украіны.

Калі Беларусь наважыцца на ваеннае ўварванне на тэрыторыю Украіны, пад пагрозай апынуцца прымежныя рэгіёны – Кіеўская, Жытомірская, Валынская і Чарнігаўская вобласці. Аднак, нават беручы да ўвагі магчымасць мабілізацыі 30 тысячаў чалавек, беларускаму войску ўсё адно можа не выстачыць сілаў. Дыктатар Аляксандр Лукашэнка сутыкнецца з сур'ёзным ударам па сваёй уладзе ў выпадку гібелі беларусаў на вайне супраць украінскай дзяржавы, ідэя вайны з якой не падтрымліваецца ў беларускім грамадстве. Пра гэта заявіў палітолаг, кіраўнік аналітычнага цэнтра Трэці сектар Андрэй Залатароў.

У інтэрв'ю "Главреду" ён расказаў, што ў выпадку нападу Беларусі на Украіну пад пагрозай апынуцца чатыры рэгіёны, якія мяжуюць з Беларуссю. Украінская армія вымушаная будзе перакінуць частку сілаў, каб прыкрыць кардон.

"Кіеўская, Жытомірская, Валынская, Чарнігаўская вобласці. Гэта значыць, тыя вобласці Украіны, якія з'яўляюцца сумежнымі з Беларуссю. Менавіта ім пагражаюць баявыя дзеянні з удзелам беларускіх войскаў, што аўтаматычна адарве частку УСУ для прыкрыцця мяжы", – мяркуе эксперт.

Аднак, паводле ягоных словаў, нават калі Лукашэнка здолее мабілізаваць 30 тысячаў чалавек, магчымасцяў для вайны супраць Украіны недастаткова. Патрэбны час на іх падрыхтоўку. У выпадку гібелі беларускіх вайскоўцаў на вайне з УСУ кіраўнік Беларусі сутыкнецца з сур'ёзным ударам па сваім кіроўным рэжыме.

"Але зноў жа 30 тысячаў чалавек, нават калі Лукашэнка мабілізуе частку людзей, мала. Да таго ж мабілізаваных трэба месяц-два рыхтаваць. Не думаю, што Лукашэнка будзе выкарыстоўваць іх як данбаскіх мобікаў, якіх бралі з філармоніі і кідалі ў якасці гарматнага мяса ў Марыюпаль, дзе іх выкошвалі сотнямі. Калі з Украіны пойдзе маса трунаў у беларускія гарады і вёскі, наступствы для Лукашэнкі будуць жаласным", – сказаў Залатароў.

Таксама палітолаг дадаў, што нягледзячы на кантроль беларускага грамадства з боку дзяржавы, усяму ёсць мяжа. Ідэя ўварвання ва Украіну ў Беларусі не мае падтрымкі. Лукашэнка разумее сітуацыю і будзе спрабаваць унікнуць поўнафарматнага ўступлення Менска ў вайну.

"Хоць беларусы дысцыплінаваныя і паслухмяныя, але ўсяму ёсць мяжа. Ідэя вайны ў беларусаў папулярнасцю не карыстаецца. Лукашэнка гэта цудоўна разумее, таму будзе лавіраваць і пятляць", – падкрэсліў Андрэй Залатароў.