Расеец скакаў праз Вечны агонь у Менску
37- 5.07.2022, 17:41
- 11,996
Яму пагражае да трох гадоў пазбаўлення волі.
Расейца абвінавачваюць у хуліганстве ў Менску - яго справа адпраўленая ў суд на разгляд, паведамілі ў пракуратуры.
Паводле інфармацыі пракуратуры, 35-гадовы мужчына прыехаў у Беларусь па працоўных пытаннях, спыняўся ў гатэлях. У адну з такіх паездак ён праязджаў побач з плошчай Перамогі і захацеў зрабіць фота на памяць. Прычым наважыў зрабіць не звычайны здымак, а падчас скачка над Вечным агнём, пішуць «Минск-Новости».
Пра яго скокі ў міліцыю паведамілі менчукі, якія назіралі за тым, што адбываецца ў той момант. Расеец нават не ведаў, што скакаць праз Вечны агонь нельга. Калі ён у чарговы раз прыехаў у камандзіроўку ў Беларусь, яго затрымалі.
Вядома таксама, што сам ён вучыўся ў вайсковай ВНУ, а яго бабуля была ўдзельніцай Вялікай Айчыннай вайны. Ягоны ўчынак палічылі цынічным.
Цяпер ён працуе ў прыватнай кампаніі ў Расеі мэнэджарам, у яго двое дзяцей.
Адзначаецца, што мужчына прызнаў віну і раскаяўся. Яму пагражае да трох гадоў пазбаўлення волі.
Да прысуду ён будзе сядзець у СІЗА.