Больш за палову згарэлых лясоў у свеце прыпала на Расею

За год плошча лясных пажараў у РФ павялічылася на 31 адсотак.

У 2021 годзе ў свеце згарэла 9,3 мільёна гектараў лясоў – плошча, роўная Партугаліі. З іх больш за пяць мільёнаў прыпадае на Расею. Пра гэта паведамляе «Би-би-си».

Паводле звестак платформы Global Forest Watch, за апошнія дваццаць гадоў тэрыторыя згарэлых лясоў амаль падвоілася. У 2021 годзе ў сярэднім у свеце лясы гарэлі з хуткасцю 16 футбольных палёў за хвіліну. Ключавы чыннік разрастання пажараў – антрапагеннае змяненне клімату, якое прыводзіць да больш высокіх тэмператураў і засушлівых умоваў, мяркуюць кліматолагі.

"Змена клімату павялічвае рызыку больш маштабных, гарачых і хутка распаўсюджвальных пажараў", – кажа доктар Дуг Мортан, кіраўнік Лабараторыі біясферных навук NASA.

Паўночныя рэгіёны свету награваюцца хутчэй, што прыводзіць да больш доўгіх сезонаў пажараў. У такіх паўночных краінах, як Канада і Расея, лясныя страты ад пажараў адчуваюцца мацней за ўсё.

У параўнанні з папярэднім годам плошча згарэлых лясоў у Расеі павялічылася на 31% – амаль да 5,4 мільёнаў гектараў. Эксперты часткова звязваюць гэта з доўгімі перыядамі спякоты.

Паводле прагнозаў ААН, да канца гэтага стагоддзя колькасць экстрэмальных пажараў павялічыцца на 50 адсоткаў. Для развязання гэтай праблемы неабходна хутка і значна скараціць глабальныя выкіды парніковых газаў, гаворачы навукоўцы.

На стан 18 жніўня 2022 года ў Расеі агонь прайшоў амаль 3,2 мільёна гектараў лесу. Больш за ўсё ад пажараў пакутуе Далёкі Усход.