У Львове закончыліся перамовы Зяленскага, Эрдагана і Гутэрыша

Што абмяркоўвалі.

Прэзідэнт Украіны Уладзімір Зяленскі абмеркаваў з турэцкім лідарам Раджэпам Таіпам Эрдаганам, які прыбыў з візітам у Львоў, расейскі ядзерны шантаж і крадзеж збожжа Расеяй.

Пра гэта паведамляе прэс-служба прэзідэнта Украіны.

Зяленскі падзякаваў Эрдагану за паездку ва Украіну і назваў візіт турэцкага лідара «важкім мэсэджам падтрымкі з боку такой магутнай краіны, як Турцыя».

Лідары абмеркавалі ўвесь комплекс двухбаковых стасункаў і пагадзіліся, што далейшае пашырэнне супрацоўніцтва паміж дзяржавамі ўзмоцніць абодва бакі. Таксама прэзідэнты закранулі пытанні абароннага ўзаемадзеяння, абмеркавалі перспектывы супрацоўніцтва ў гэтым кірунку.

Таксама Зяленскі і Эрдаган казалі аб маштабным выкраданні Расеяй збожжа на часова акупаванай тэрыторыі Украіны.

«Было сказана, што акупанты прысвоілі амаль 0,5 млн тон збожжа. Лідары пагадзіліся, што ўсялякі гандаль крадзеным недапушчальны», - паведамляе прэс-служба прэзідэнта Украіны.

Прэзідэнты абмеркавалі сітуацыю вакол Запарожскай АЭС і ядзерны шантаж з боку РФ, дзеянні якой пагражаюць катастрофай Украіне і ўсяму свету. Зяленскі зноў паўтарыў, што Расея павінна вывесці свае войскі са станцыі неадкладна.