У Нясвіжскім раёне з балота дасталі пенсіянера

Ён правёў у дрыгве амаль двое сутак.

Фермеры заўважылі аўтамабіль, які два дні стаяў на ўскраіне вёскі ля возера, але яго гаспадара ніхто не бачыў. Калі яны падышлі да машыны, то пачулі незразумелыя гукі непадалёк і выклікалі ратавальнікаў. Гаспадара машыны знайшлі – за 300 метраў ад аўтамабіля, у багне. Мужчына правёў там амаль двое сутак, паведамляе прэс-служба МНС.

27 верасня ў 17.13 ратавальнікам паступіла паведамленне, што каля возера, ля забалочанай мясцовасці, каля вёскі Бучныя Нясвіжскага раёна з 25 верасня стаіць аўтамабіль – ягонага гаспадара ніхто не бачыў.

– На лінію ратавальнікаў патэлефанавалі мясцовыя фермеры, якім падалося падазроным, што ўвесь гэты час машына знаходзілася каля дарогі, – расказаў выратавальнік Сяргей Шчурскі. – Падышоўшы да яе, яны пачулі нейкія гукі і патэлефанавалі ў МНС.

Калі на месца прыбылі ратавальнікі і сталі клікаць чалавека, яны пачулі ціхае мыканне і сталі прабірацца на гук. Ісці давялося па забалочанай мясцовасці з высокім узроўнем вады.

На адлегласці 300 метраў ад аўтамабіля ў дрыгве ратавальнікі знайшлі пенсіянера. Пажылога мужчыну выцягнулі на руках да берагу, дзе пагрузілі на насілкі медыкаў.

З папярэднім дыягназам «агульнае пераахаладжэнне» пенсіянер дастаўлены ў лякарню.