Нямецкая хваля: Нямеччына дазволіла перадаць танкі Leopard Украіне

Пастанову прыняў федэральны канцлер Олаф Шольц.

Канцлер Нямеччыны Олаф Шольц (Olaf Scholz) прыняў пастанову накіраваць Украіне асноўныя баявыя танкі Leopard 2, а таксама дазволіць аналагічныя дзеянні іншым краінам, сярод іншых Польшчы. Пры гэтым гаворка ідзе сама меней аб адной роце танкаў Leopard 2 A6. Іншыя супольнікі, у Скандынавіі, таксама прымуць пастановы аб пастаўках сваіх танкаў Leopard Кіеву. Аб пастанове ўлад Нямеччыны даць Украіне нямецкія баявыя танкі паведамілі ўвечары ў аўторак, 24 студзеня, вядучыя СМІ са спасылкай на крыніцы ў Бэрліне. Афіцыйнага пацвярджэння гэтай інфармацыі пакуль няма, перадае "Нямецкая хваля".

Старшыня камітэта абароны бундэстага Мары-Агнэс Штрак-Цымэрман (Marie-Agnes Strack-Zimmermann) вітала пастанову аб пастаўках баявых танкаў Украіне, назваўшы яго важным крокам у адбіцці расейскага ўварвання. Яна адзначыла, што прыняцце пастановы заняло доўгі час, але ў выніку яна была непазбежнай. «Тое, што Нямеччына дазволіць краінам-партнёрам перадаваць свае танкі, а таксама будзе пастаўляць іх сама, з'яўляецца суцяшальнай навіной для змардаванага і адважнага ўкраінскага народа», - адзначыла яна.

У сваю чаргу лідар апазіцыйнай фракцыі ХДУ/ХСУ у бундэстагу Фрыдрых Мэрц (Friedrich Merz) таксама прывітаў пастанову ўрада ФРГ, але ў той жа час абвінаваціў канцлера Олафа Шольца ў няцвёрдасці. Паводле ягоных слоў, Шольцу трэба было абвясціць аб пастанове разам з прэзідэнтам Францыі Эмануэлем Макронам на ўрачыстасцях у Парыжы ў мінулыя суботу-нядзелю з нагоды 60-годдзя Элісейскай умовы, але ён занадта доўга вагаўся.