Гісторыя з забітай расейцамі 15-гадовай украінкай, цела якой хавалі ў Беларусі, атрымала прадаўжэнне

Падрабязнасці.

Галоўны патолагаанатам Гомельшчыны, які кіраваў моргамі рэгіёна ў перыяд пошукаў забітай пад Кіевам Арыны Яцюк, змяніў працу. «Штодзень» прасачыў кар'ерныя зігзагі чалавека, які можа валодаць інфармацыяй аб лёсе забітай дзяўчыны.

Цела забітай расейскімі вайскоўцамі 15-гадовай кіянкі Арыны Яцюк амаль год знаходзілася ў Беларусі. У той перыяд начальнікам Гомельскага абласнога клінічнага патолагаанатамічнага бюро быў Аляксей Лагвінцоў. Дзяржаўныя СМІ нават пісалі аб ім як аб адным з самых паспяховых выпускнікоў Гомельскага медуніверсітэта. І менавіта ён з'яўляецца ў сюжэце прапагандысткі Анастасіі Бенедзісюк, якая 12 сакавіка 2022 года зняпраўджвала інфармацыю, што ў Гомельскую вобласць звозяць трупы забітых людзей падчас нападу Расеі на Украіну. І ў гэты самы час блізкія Арыны Яцюк шукалі дзяўчынку на тэрыторыі Гомельскай вобласці.

Даведка. Аўтамабіль сям'і Яцюк быў расстраляны расейскімі захопнікамі 03.03.22 падчас спробы эвакуацыі каля вёскі Матыжына Кіеўскай вобласці. Бацькі загінулі на месцы, а дзяўчына, паводле неафіцыйнай інфармацыі, была параненая ў нагу і яе забралі вайскоўцы РФ. Пазней з’явіліся звесткі, што дзяўчыну маглі вывезці на тэрыторыю Беларусі. Аднак гомельскія міліцыянты і медыкі сцвярджалі, што на тэрыторыі вобласці не знайшлі слядоў зніклай Арыны Яцюк.

На сайце Гомельскага абласнога клінічнага патолагаанатамічнага бюро ўказваецца, што начальнік там зараз не Аляксей Лагвінцоў, а зусім іншы чалавек: Тарасенка Сяргей Васільевіч.

І самае дзіўнае, што ва ўсёй структуры абласнога патолагаанатамічнага бюро прыкладна ў паловы няма загадчыкаў: указаныя менавіта выканаўцы абавязкаў, гэта значыць, асобы, якія выконваюць работу загадчыкаў, аднак не займаюць яе. Так, замест загадчыкаў выконваюць абавязкі загадчыкаў у Рэчыцкім, Рагачоўскім, Светлагорскім і Мазырскім міжраённых патолагаанатамічных аддзяленнях. Можна было б падумаць, што гэта так пасада называецца. Але ў іншых раённых аддзяленнях іншых абласцей менавіта загадчыкі, а не выканаўцы абавязкаў.

Згодна са статутам патолагаанатамічнага бюро, прадметам яго дзейнасці з'яўляецца ўстанаўленне прычын смерці хворых, наданне рытуальных паслуг, аналіз якасці лячэбнай і дыягнастычнай работы. Начальніку бюро падпарадкоўваюцца і раённыя патолагаанатамічныя аддзяленні. Дарэчы, менавіта выканаўца абавязкаў Мазырскага міжраённага патолагаанатамічнага аддзялення Станіслаў Галаўко (і дагэтуль з'яўляецца выканаўцам абавязкаў) у прапагандысцкім сюжэце Анастасіі Бенедзісюк указваў, што ў Мазыры няма ніякіх трупаў забітых ва Украіне.

«Арыну спрабуем шукаць у Калінкавічах і Мазыры. Мы чулі, што менавіта туды прывозілі шмат параненых дзяцей», - звярталася ў ліпені 2022 года ў рэдакцыю «Штодня» цётка падлетка. У снежні 2023 года журналісты obozrevatel.com напісалі матэрыял, паводле якога цела Арыны Яцюк перадалі ва Украіну па абмене і яе апазналі па ДНК. У кастрычніку 2023 года дзяўчынку пахавалі побач з забітымі расейцамі бацькамі.

Дзе зараз працуе былы начальнік Гомельскага абласнога клінічнага патолагаанатамічнага бюро, сапраўды цяжка прасачыць. Паводле інфармацыі сайта by.linkedin.com, Аляксей Лагвінцоў працаваў у Гомельскім абласным клінічным патолагаанатамічным бюро аж да студзеня 2023 года.

LinkedIn - гэта найбуйнейшая ў свеце сетка прафесійных кантактаў, размешчаная ў інтэрнэце і з дапамогай якой шукаюць працу і ўмацоўваюць прафесійныя стасункі. Наколькі можна давяраць інфармацыі пра Аляксея Лагвінцова на гэтым сайце, цяжка сказаць. Аднак паводле гэтага рэсурсу, былы галоўны патолагаанатам Аляксей Лагвінцоў са студзеня 2023 года працуе галоўным лекарам у Медыцынскім цэнтры «Альфаклінік». На сайце медцэнтра пазначанае, што яны паспяхова лечаць «розныя захворванні пазваночніка і нервовай сістэмы, якія так перашкаджаюць адчуць усю паўнату і радасць жыцця». Праўда, сам медыцынскі цэнтр наогул не дае ніякай інфармацыі аб галоўным лекары (і ці ёсць ён там наогул).