Прадстаўнік Польшчы: Мы гатовыя прыняць складаныя пастановы пра закрыццё мяжы з Беларуссю

Польшча жорстка адказвае на дзеянні Крамля і рэжыму Лукашэнкі.

Польшча прыме «неабходныя пастановы», калі гэта будзе «апраўдана і неабходна», заявіў прэс-сакратар міністра-каардынатара спецыяльных службаў Польшчы Станіслаў Жарын, каментуючы магчымасць поўнага закрыцця Польшчай мяжы з Беларуссю.

– Я не хачу сцвярджаць у гэтым пытанні, – адзначыў Жарын у інтэрв'ю Polskie Radio 24. – Пастанова запатрабуе аналізу розных чыннікаў і наступстваў, але неабходныя пастановы будуць прынятыя. Урад мае намер прымаць цяжкія пастановы, калі ўмовы не дапускаюць іншых варыянтаў».

Ён адзначыў, што РФ даўно здольная «прымушаць і выкарыстоўваць беларускія структуры ў сваіх мэтах».

«Відавочна, што пры прыняцці найбольш важных пастановаў Крэмль уплывае на дзеянні Менска, – заявіў прадстаўнік польскіх спецслужбаў. – Гэта прывяло да міграцыйнага крызісу на мяжы з Беларуссю, што адпавядае інтарэсам Расеі. Паводзіны беларускіх уладаў – неад'емная частка дзеянняў Расеі супраць Польшчы».

Нагадаем, што з 10 лютага Польшча закрыла пункт пропуску «Баброўнікі», рэагуючы на жорсткі прысуд палітвязню Анджэю Пачобуту.