У Беларусі афіцыйна з'явілася новая прафесія
6- 7.02.2023, 18:44
- 16,294
Разбежка заробкаў – ад 600 да 2500 рублёў.
У Беларусі афіцыйна прызнаная новая прафесія – фларыст: цяпер яе можна ўказваць у дамове і працоўнай кніжцы, піша zerkalo.io.
Якія патрабаванні
Для фларыстаў зацверджаны спецыяльны прафесійны стандарт, ён унесены ў Адзіны тарыфна-кваліфікацыйны даведнік працаў і прафесій працоўных. Паводле яго, фларыст у залежнасці ад кваліфікацыі можа мець 3-і, 4-ы ці 5-ы разрад.
Так, фларыст 3-га разраду павінен умець падрыхтаваць працоўнае месца і прыбраць яго да канца змены, у тым ліку ўтылізаваць адкіды. Яму належыць разбірацца ў відах і назвах кветак і батанічных матэрыялаў, ведаць іх значэнні ў розных культурных і нацыянальных традыцыях. Акрамя таго, ён павінен умець апрацоўваць і пакаваць зрэзаныя кветкі і ствараць простыя фларыстычныя вырабы.
Да супрацоўніка 4-га разраду патрабаванні вышэйшыя – ён павінен умець вырабляць вырабы сярэдняй складанасці, у тым ліку круглыя, каскадныя і асіметрычныя кампазіцыі ў спіральнай і паралельнай тэхніках. Яму трэба будзе ствараць і перасаджваць кампазіцыі з гаршковых раслінаў, таксама на ім афармленне тавару са склада, прыём заказаў, разлік з пакупнікамі і вядзенне ўліковай дакументацыі.
А працаўнік 5-га разраду, акрамя ўсяго вышэйпералічанага, павінен умець вырабляць яшчэ і складаныя вырабы нестандартных формаў, ствараць фларыстычны дэкор інтэр'еру і экстэр'еру, кветкавыя стэнды, ведаць асаблівасці пратакольнага, вясельнага, жалобнага, святочнага афармлення.
Колькі плацяць фларыстам
На сайце rabota.by цяпер шукаюць фларыстаў на 42 вакансіі ў Менску. Разбежка заробкаў – ад 600 да 2500 рублёў, часцей за ўсё гатовыя плаціць прыкладна 1000–1200 рублёў. Сярод патрабаванняў – уменне складаць букеты і кветкавыя кампазіцыі, у тым ліку паводле фота, догляд раслінаў, кансультаванне пакупнікоў і вядзенне касы.
Як з'яўляюцца прафесіі
Нагадаем, у Беларусі найменне ўсіх прафесій вызначаецца згодна з кваліфікацыйнымі даведнікамі, на якія абавязаныя абапірацца дзяржаўныя і прыватныя арганізацыі. Толькі пасля зацвярджэння прафстандарту наймальнік можа ўключыць тую ці іншую прафесію ў штатны расклад арганізацыі і прыняць супрацоўніка на працу, у тым ліку ўказаўшы ягоную пасаду ў дамове і працоўнай кніжцы.
Распрацаваць прафесійны стандарт часта прапануюць зацікаўленыя ў гэтым асацыяцыі і буйныя арганізацыі. Напрыклад, у выпадку з фларыстамі адным з ініцыятараў стаў каледж дэкаратыўна-ўжытковага мастацтва.
А летась з падачы розных асацыяцый у Беларусі з'явіліся яшчэ чатыры прафесіі – наладнік апаратнага праграмнага забеспячэння, мантажнік фасадных сістэмаў, лазеннік і барыста. А з ініцыятывы трактарнага завода распрацоўваецца прафстандарт «лічбавая метралогія».